Mae digwyddiadau Gwyddeleg yn cael eu cynnal ym mhob swydd yn Iwerddon heddiw (Mawrth 13).
Fel rhan o ŵyl Wyddeleg fwyaf y byd, Seachtain na Gaeilge le Energia, mae cynllun Lá na gCiorcal yn golygu bod grwpiau ledled y wlad yn cymryd rhan.
Mae’r grwpiau hynny’n rhoi cyfleoedd i bobol ddefnyddio’r iaith mewn digwyddiadau yn eu cymuned.
Bydd yr ŵyl yn cael ei chynnal nes Mawrth 17, ac mae digwyddiadau Gwyddeleg yn cael eu cynnal ym mhob rhan o Iwerddon a thros y byd.
‘Datblygu cariad at yr iaith’
Cafodd yr ŵyl ei chynnal am y tro cyntaf yn 1902, a chaiff ei threfnu gan grŵp iaith Conradh na Gaeilge.
“Cafodd Lá na gCiorcal ei gynnal am y tro cyntaf y llynedd er mwyn amlygu’r digwyddiadau gwych mae grwpiau cymunedol yn eu trefnu ledled y wlad drwy gydol y flwyddyn,” meddai Conchubhair Mac Lochlainn, Cadeirydd Seachtain na Gaeilge le Energia.
“Eleni, rydyn ni wrth ein boddau yn partneru â Down Syndrom Ireland ac yn edrych ymlaen at groesawu pobol i ddigwyddiadau yn eu cymunedau.”
Dywed Down Syndrome Ireland eu bod nhw wrth eu boddau i fod ynghlwm â’r ŵyl am y tro cyntaf.
“Rydyn ni’n ddiolchgar i Conradh na Gaeilge am eu cefnogaeth i gydweithio i sefydlu ein Ciorcal Cómhrá (grŵp sgwrsio Gwyddeleg) cyntaf un, ac yn edrych ymlaen at greu mwy o gyfleoedd i’n haelodau fynegi a datblygu eu cariad tuag at yr iaith Wyddeleg,” meddai Elizabeth Fox, Swyddog Addysg Oedolion Down Syndrome Ireland.
