Mae Dominic Cummings wedi cael ei gyhuddo am dorri rheolau Whitehall o ran uwch swyddogion yn cymryd gwaith cyflogedig ar ôl gadael y llywodraeth.
Dywedodd yr Arglwydd Pickles, cadeirydd y Pwyllgor Cynghori ar Benodiadau Busnes (Acoba), fod cyn-brif gynghorydd Boris Johnson wedi methu â hysbysu’r panel am flog y lansiodd ar wefan Substack ac y cafodd ei dalu amdano.
Mae Acoba i fod i edrych ar unrhyw benodiad a gymerir gan weinidogion neu uwch swyddogion o fewn dwy flynedd i adael ei swydd.
Ers lansio ei flog yn gynharach eleni, mae Dominic Cummings wedi defnyddio ei flog i ymosodiad ar Mr Johnson a’i ymdriniaeth o bandemig Covid-19.
Mewn llythyr at Weinidog Swyddfa’r Cabinet, Michael Gove, dywedodd yr Arglwydd Pickles ei bod yn ymddangos bod Dominic Cummings yn cynnig “gwahanol wasanaethau am daliadau” drwy’r blog, ac roedd hefyd yn derbyn taliadau tanysgrifio ar ei gyfer.
Dywedodd mai mater i’r Llywodraeth yw penderfynu pa gamau i’w cymryd i orfodi ei rheolau ei hun.
“Mae Mr Cummings wedi methu â gofyn am gyngor y pwyllgor ar y gwaith masnachol hwn, ac nid yw’r pwyllgor wedi cael ateb i’n llythyr yn gofyn am esboniad,” ysgrifennodd yr Arglwydd Pickles.
“Mae methu â cheisio ac aros am gyngor cyn ymgymryd â gwaith yn torri rheolau’r Llywodraeth.
“Ni fydd y pwyllgor yn cynghori’n ôl-weithredol o dan yr amgylchiadau hyn.
“Mater i’r Llywodraeth yn awr yw penderfynu pa gamau priodol i’w cymryd.”
