“Tân bwriadol” wedi dinistrio pafiliwn clwb criced yn Sir Fynwy

Mae Clwb Criced Monkswood yn Sir Fynwy yn dweud bod eu pafiliwn wedi’i ddinistrio gan dân bwriadol neithiwr (nos Iau, Rhagfyr 21).

Mae’r clwb, sy’n chwarae yng Nghynghrair De-ddwyrain Cymru, yn gofyn i unrhyw un sydd â gwybodaeth i gysylltu â’r heddlu.

Dywed y clwb eu bod nhw mewn “sioc llwyr” yn sgil y tân, ond na fydd y digwyddiad yn eu “trechu” nhw.

“Rydyn ni’n benderfynol y byddwn ni’n chwarae criced ar y cae yn 2024,” meddai’r datganiad ar y cyfryngau cymdeithasol.

Cefnogaeth

Mae llu o glybiau criced ledled Cymru wedi datgan eu cefnogaeth i Glwb Criced Monkswood yn dilyn y tân.

Mae Criced Cymru hefyd yn dweud y byddan nhw’n gwneud popeth o fewn eu gallu i’w cefnogi nhw.

Mae Tony Kear, y cynghorydd Ceidwadol lleol, wedi mynegi ei “dristwch” yn sgil y digwyddiad.

“Dw i’n gwybod pa mor angerddol yw’r chwaraewyr a’r aelodau yng Nghlwb Criced Monkswood, a minnau wedi chwarae a dyfarnu yno,” meddai.