Eos i gynnal dau gyfarfod yn sgil anghydfod

Bydd Eos, y mudiad sy’n ceisio sicrhau bod cerddorion Cymraeg a Chymreig yn derbyn rhagor o arian am ddarlledu eu caneuon, yn cynnal dau gyfarfod gyda’u haelodau ym mis Chwefror.

Bydd y ddau gyfarfod yn cael eu cynnal ar Chwefror 5 yng Nghaerdydd ac ar Chwefror 8 yng Nghaernarfon.

Mae Eos yn ystyried ar hyn o bryd a ddylen nhw ddefnyddio canolwr annibynnol i ddatrys yr anghydfod gyda’r BBC.

Dywedodd y BBC yr wythnos diwethaf eu bod yn fodlon talu am ganolwr er mwyn dod i gytundeb.

Mae Golwg360 wedi cael ar ddeall mai hyn fydd prif ystyriaeth y ddau gyfarfod.

Does gan Radio Cymru mo’r hawl i chwarae nifer fawr o ganeuon Cymraeg tra bod yr anghydfod yn parhau, gan fod nifer fawr o gerddorion wedi tynnu’r hawl oddi wrth y BBC bythefnos yn ôl.

Roedd y canwr Bryn Fôn yn y Senedd yr wythnos diwethaf er mwyn trafod y sefyllfa gydag Aelodau’r Cynulliad.

Dywedodd ar y pryd nad oedd yn ffyddiog y byddai cytundeb yn digwydd yn y dyfodol agos, ac y gallai’r sefyllfa barhau am hyd at chwe wythnos arall.

“Os ydan ni’n gorfod cynnal cyfarfod cyffredinol brys er mwyn cael mandad gan ein haelodau, fe allai gymryd chwe wythnos. Felly, fe all y llanast yma barhau ar Radio Cymru am chwe wythnos arall,” meddai.

14 sylw

Al 23 Ionawr 2013, 16:53

Sdim dwywaith fod yr anghydfod yn andwyol i wasanaeth BBC Cymru ar hyn o bryd. Gwn am nifer sydd wedi arallgyfeirio at orsafoedd arall. Ond ar hyn o bryd BBC Cymru sy’n cael ei darlunio fel y bwgan’ yn y sefyllfa. Ond onid oes cwestiwn o fod yn farus o ran aelodau eos. Mae ambell berfformiwr poblogaidd iawn wedi dweud eu bod yn credu bod cynnig BBC yn deg a bod breindaliadau’r gorffennol wedi bod yn hynod o hael a bod perfforwyr Cymraeg wedi cael taliadau bras. Mae gweld beth oedd tal pob munud dan yr hen drefn yn profi hynny. Beth bynnag, mae angen cytundeb er mwyn adfer safon rhaglenni Radio Cymru

CGT 23 Ionawr 2013, 17:22

Pwy sy’n credu fod cynnig y BBC yn deg ?

Al 23 Ionawr 2013, 18:31

Ambell artist cerddorol digon poblogaidd!

irfon 23 Ionawr 2013, 21:04

‘Dwi’n meddwl fod cynnig y BBC yn deg. Ac, o be dwi wedi glywed, mae Radio Cymru lot gwell ar hyn o bryd. Lot mwy o sgyrsiau diddorol a llai o ganeuon bland. Lot o son am 30,000 o ganeuon ond y gwir ydi mai dim ond tua 100 mae Radio Cymru yn chwarae. Drosodd a drosodd a drossodd a drosodd…dos ryfadd fod Bryn Fon yn protestio.

Al 23 Ionawr 2013, 23:40

Cytuno ag Irfon. Er nad wyf yn or hoff o ormodedd o ganeuon Saesneg ar Radio Cymru mae wedi bod yn chwa o awyr iach i glywed caneuon Cymraeg newydd neu rai na chlywyd son amdanynt ers tipyn. Mae llawer o awrywiaeth ar gael heb ddibynnu ar yr un hen ganeuon ac artistiaid o hyd. Tybed a oes rhai artistiaid wedi cael gormod o fonopoli o ran eu caneuon yn cael ‘blaenoriaieth’ ar y rhgalenni. Mae’r argyfwng wedi dangos nad oes angen dibynnu ar yr un hen artistiaid a’u caneuon (er mor dda ydynt) – mae digon o artistiaid Cymraeg a Chymreig wedi dod i’r amlwg yn sgil y sefyllfa a da o beth yw hynny. tal teg i aelodau EOS – ie yn bendant – ond nid oes angen fod yn farus.

CGT 24 Ionawr 2013, 08:13

Mae rhywun yn amau ar brydiau fod darlledu yng Nghymru yn ‘glwb’ o ffrindiau sy’n troi’r dwr i felin ei gilydd. Serch hynny, yr egwyddor yw triniaeth anghyfartal i gerddorion Cymraeg, hyd y gwelaf i. Serch fy mod innau yn tybio fod y gwasanaeth wedi gwella o ran ansawdd darlledu heb yr hen ffefrynnau ‘bland’ , mater arall ydyw o ran cynnal, a chwyddo darlledu poblogaidd yn y Gymraeg. Kev Bach a Jonsi wrth eu boddau, mae’n siwr.

Llinos Morgan 24 Ionawr 2013, 08:13

Sud yda chi’n gwybod faint yw’r cynnig gan y BBC? Faint yw e o ran diddordeb?

irfon 24 Ionawr 2013, 09:21

@Llinos- o be ’dwi’n ddallt (a falla mod i’n anghywir) cynnig diweddara y BBC oedd £1.50 y munud. Mae hyn yn adlweyrchu’r nifer o wrandawyr sydd gan Radio Cymru yn ol RAJAR (sef o gwmpas 150,000). Mae cerddorion Asian Network yn cael £6.00 y munud o be ’dwi’n ddallt oherwydd fod yr orsaf honno yn cael (eto, ffigyrau RAJAR) 600,000 o wrandawyr. Tydi o byth yn ’wyddoniaeth pur’ ond ’dwi’n meddwl fod £1.50 yn ffigwr teg iawn. Mae Eos mewn perygl o wneud smonach o hyn fel ymgyrch PR oherwydd eu bod yn dod drosodd (os ydi o’n wir neu beidio) yn farus ac yn hynod o naive.

Andreas 24 Ionawr 2013, 11:42

£4.50 am gan 3 munud. Faint o cyt mae EOS yn gymud ta?

Mari 24 Ionawr 2013, 12:02

Tipyn mwy nag isafswm cyflog yr awr

Gwilym Dwyfor 24 Ionawr 2013, 12:53

I ddechrau, tydi rhaglenni radio Cymru heb wella yn ddiweddar. Os da chi’n meddwl bod malu cachu di drugaredd a chwara jingyls cawslyd a theme tune rocky o dro i dro yn dda, Duw a’ch helpo chi! Ac yn ail, os ydi EOS mo’r afresymol ag y mae ambell un yn trio’i neud allan, sut ddaethon nhw i gytundeb efo s4c mor sydyn?

irfon 24 Ionawr 2013, 13:08

@Andreas. Dwi’m yn meddwl fod Eos yn cymeryd ‘cut’. Falla eu bod yn gobeithio cymeryd canran fechan ar gyfer costau a.y.b. (fel PRS). Ond tydw i ddim yn arbennigwr yn y maes a falla mod i’n rong. Ond mae £4.50 yn swnio’n ddigon teg i mi. Yn enwedig os ’da chi’n un o’r artistiaid lwcus mae Radio Cymru yn chwarae drosodd a drosodd (a drosodd) fel Bryn Fon, Caryl Parry Jones, Meic Stevens ac eraill (ond nid Ac Eraill!). Mae’r £4.50 yna yn adio’i fynny i swm eitha twt bob chwarter.

Dan 24 Ionawr 2013, 14:02

Mae hwn yn gwestiwn gwahanol, tydi? I ddweud y gwir, dwi’n amau, ar ol i’r anghydfod yma fod drosodd, ac ar ol i’r mwg glirio, bydd angen i’r BBC edrych yn ddifrifol ar ba gerddoriaeth mae nhw’n ei chwarae yn ystod y dydd, er mwyn rhoi adlewyrchiad gwell o be sy’n digwydd yn y Sin Gerddoriaeth Gymraeg gyfoes.

Mae gormod o bobol wedi eu troi i ffwrdd o gerddoriaeth Gymraeg dros y blynyddoedd oherwydd agenda saff, canol-y-ffordd BBC Radio Cymru. Dwi’n gweld sylwadau ar y wefan yma gan bobol sydd, mae’n amlwg, yn gwbwl anwybodus o’r gerddoriaeth Gymraeg gwerth chweil sy’n cael ei gynhyrchu heddiw, a hynny’n amlwg oherwydd amharodrwydd y BBC i’r chwarae cyn 7 o’r gloch yr hwyr. Mae hwn, os rywbeth, yn fwy o sgandal na’r ddadl am dâl teg.

Meirionwr 24 Ionawr 2013, 18:02

Cytuno a sylwadau Irfon. I ni bensiynwyr mae’n hyfryd iawn clywed ambell gân werin ac emyn neu gerddoriaeth glasurol yn rhan o arlwy R Cymru’r dyddiau yma, yn enwedig yn ystod y dydd pan fydd llai o wrandawyr sy’n ffoli ar gerddoriaeth “ysgafn”. Gobeithio y cawn yr arlwy yma, a chydig o Gerdd Dant, pan ddaw’r anghydfod i ben. Ond, o ran hynny, pe bai’r Talwrn yn dod nôl byddwn i’n hapus iawn gyda phethau fel y maent.

Mae’r sylwadau wedi cau.

Eos i gynnal dau gyfarfod yn sgil anghydfod

Bydd y mudiad y cwrdd yng Nghaerdydd a Chaernarfon ym mis Chwefror

Poblogaidd

Swyddi

Aelodau

Swyddog Iaith Gymraeg

Ceidwad Cadw (Gogledd Cymru)

Ceidwad Cadw (De Cymru)

Rheolwr Gwybodaeth i’r Cyhoedd

Cyfarwyddwr Cyfathrebu a Marchnata Menter a Busnes

Pennaeth Technoleg, Newid ac Arloesi Menter a Busnes

Pennaeth Datblygu Masnachol Menter a Busnes

Rheolwr Gweinyddol

Cyfarwyddwr Addysg, Gwasanaethau Plant a Theuluoedd

← Stori flaenorol

Awdur o Fangor yn ennill gwobr am ei lyfr i bobl ifanc

Stori nesaf →

Ffilm: ‘Deddfau ysmygu Cymru’n rhy llym’

Hefyd →

Cynnig cwtogi cytundebau llawn amser corws Opera Cenedlaethol Cymru

14 sylw