Mae disgwyl y bydd Llafur yn ennill yn gyfforddus yn isetholiad De Caerdydd a Phenarth heddiw ac fe allai’r bleidlais gael effaith ar etholiad Comisiynydd Heddlu De Cymru hefyd.
Pennaeth Oxfam yng Nghymru, Stephen Doughty, yw’r ffefryn i ddilyn Alun Michael sydd wedi ymddiswyddo er mwyn cynnig am swydd y Comisiynydd.
Roedd ef wedi ymyrryd yn ddadleuol i gefnogi Stephen Doughty wrth iddo geisio am yr enwebiad Llafur ond does dim disgwyl i hynny effeithio ar y canlyniad.
Cyfle i roi barn
Er bod pleidlais a mwyafrif y Blaid Lafur wedi syrthio ychydig yn yr Etholiad Cyffredinol, dyma fydd cyfle cynta’ pleidleiswyr yng Nghymru i roi eu barn ar Lywodraeth y Glymblaid yn Llundain.
Dyma’r isetholiad cynta’ yn yr ardal ers union 70 mlynedd yn ôl pan oedd isetholiad yn Nwyrain Caerdydd yn 1942.
Fe allai’r isetholiad gael effaith ar bleidlais y Comisiynydd Heddlu hefyd, gan fod lefel y pleidleisio’n debyg o fod yn uwch nag mewn etholaethau eraill … ac Alun Michael yw’r ymgeisydd Llafur yn yr etholiad hwnnw.
Y manylion
Yn yr Etholiad Cyffredinol, roedd gan Lafur fwyafrif o 4,709 tros y Ceidwadwyr – bwlch o 10.6%.
Y saith ymgeisydd:
Stephen Doughty, Llafur
Robert Griffiths, Y Blaid Gomiwnyddol
Andrew Jordan, Llafur Sosialaidd
Bablin Molik, Democratiaid Rhyddfrydol
Luke Nicholas, Plaid Cymru
Anthony Slaughter, Plaid Werdd
Craig Williams, Ceidwadwyr
Stephen Zeigler, UKIP
