Mae Heddlu’r Gogledd yn cynnal ymchwiliad ar ôl i ddyn gael ei drywanu yn ystod digwyddiad ger siop cebabs ym Mhrestatyn neithiwr.
Yn ôl yr heddlu fe ddechreuodd ffrae yn nhafarn Offa’s Tavern yn y Stryd Fawr yn y dref am 11yh nos Sul. Roedd nifer o ddynion wedi bod yn rhan o’r digwyddiad gan ymladd gyda’i gilydd tu allan i’r dafarn.
Cafodd dyn 26 oed ei drywanu yn ystod y digwyddiad. Cafodd ei gludo i Ysbyty Glan Clwyd ond mae’n debyg nad yw ei anafiadau yn rhai difrifol.
Cafodd tri dyn eu harestio ac maen nhw’n cael eu holi gan yr heddlu.
Mae’r heddlu’n apelio am dystion i’r digwyddiad ac maen nhw’n awyddus i holi unrhyw un oedd yn yr Offa’s Tavern neu a welodd y ffrae tu allan i’r siop.
Dylai unrhyw un gyda gwybodaeth ffonio’r heddlu ar 101 neu Taclo’r Taclau ar 0800 555 111.
