Cowbois Rhos Botwnnog
Mae dau albwm Gymraeg wedi hawlio lle ar restr fer Gwobr Gerddoriaeth Gymreig 2012.
Bydd Cowbois Rhos Botwnnog a Huw M yn wynebu rhai o fandiau mwyaf adnabyddus Cymru a thu hwnt.
“Mae’n fraint ac yn anrhydedd fod yn rhan o restr fer y Wobr Gerddoriaeth Gymraeg,” meddai Cate Le Bon, sydd hefyd wedi cyrraedd y rhestr fer gyda’i halbwm diweddaraf, ‘CYRK’, ar Twitter yn gynharach heddiw.
Ymhlith y deuddeg albwm ar y rhestr fer mae bandiau byd enwog fel Kids In Glass Houses a Los Campesinos!
Cyngerdd
Cafodd y wobr ei chyflwyno am y tro cyntaf y llynedd gan y DJ adnabyddus a chyn gyflwynydd y rhaglen ‘Bandit’, Huw Stephens ynghyd â’r hyrwyddwr cerddoriaeth, John Rostron.
Bydd yr enillydd yn cael ei gyhoeddi ar 18 Hydref, yn dilyn penderfyniad gan rai o arbenigwyr mwyaf y sin gerddorol.
Eleni, bydd cyngerdd yn cael ei chynnal noson cyn y gwobrwyo yn y Coal Exchange yng Nghaerdydd, gyda rhai o’r bandiau sydd wedi’u henwebu yn perfformio.
Gruff Rhys, cyn aelod o’r band Super Furry Animals, oedd yn fuddugol yn 2011 gyda’i albwm ‘Hotel Shampoo’.
Y rhestr fer
Bright Light Bright Light – Make Me Believe in Hope
Cate Le Bon – CYRK
Cowbois Rhos Botwnnog – Draw Dros Y Mynydd
Exit International – Black Junk
Future of the Left – The Plot Against Common Sense
Huw M – Gathering Dusk
Islet – Illuminated People
Jodie Marie – Mountain Echo
Kids in Glass Houses – In Gold Blood
Kutosis – Fanatical Love
Los Campesinos! – Hello Sadness
Truckers of Husk – Accelerated Learning
