1,500 yn Gig Hanner Cant

Mae trefnwyr Gŵyl Hanner Cant a gynhaliwyd ym Mhontrhydfendigaid wythnos yn ôl wedi dweud bod y digwyddiad yn llwyddiant ysgubol.

Roedd yr ŵyl gerddorol yn llwyfannu hanner cant o artistiaid Cymraeg fel rhan o ddathliadau hanner canmlwyddiant Cymdeithas yr Iaith Gymraeg — y gig Cymraeg mwyaf erioed yn ôl nifer.

Yn ôl y trefnwyr roedd yn agos at 1,500 o bobl wedi bod i’r digwyddiad, a’r awyrgylch yn profi bod y sin gerddoriaeth Gymraeg yn fyw ac yn hynod iach.

“Rydan ni’n falch iawn o fod wedi llwyddo i gyflawni’r prosiect uchelgeisiol yma’n effeithiol,” meddai un o’r trefnwyr, Huw Lewis.

“Roedd y gerddoriaeth o’r safon uchaf a’r gynulleidfa’n werthfawrogol iawn. Rhaid i ni ddiolch i’r artistiaid am eu cydweithrediad parod a’r gynulleidfa hefyd. Ond, yn fwy na dim ry’n ni am ddiolch i’r holl bobl a gyfrannodd eu hamser yn wirfoddol ymlaen llaw a dros y penwythnos i helpu sicrhau llwyddiant y gig hanesyddol yma.”

Negeseuon cadarnhaol y cerddorion

“Diolch i HannerCant ac i bawb ddaeth i wylio/gwrando. Gwyl a hanner. Pwy ddwedodd bod yr SRG ddim yn iach? Gobeithio cawn HannerCantacUn…” meddai’r cerddor Huw M ar Twitter.

“Pontrhydfendigaid #hannercant #gig50 yn hollol wych. Yr holl brofiad. Diolch yn fawr i’r trefnwyr anhygoel @cymdeithas @HannerCant” oedd ymateb y canwr, Geraint Løvgreen.

Roedd y gantores a’r gyflwynwraig, Elin Fflur yn drist bod y penwythnos ar ben wrth drydar nos Lun: “Dwi’n gutted bo’r penwythnos dwytha’ ’ma drosodd! Rhywun arall yn teimlo run fath? Dwi’m yn siwr iawn be i neud efo fi fy hyn! #hannercant”

Ewch i’r adran flogiau i weld Rhys Llwyd yn cloriannu ei ddeng mlynedd gyda Chymdeithas yr Iaith

13 sylw

Rhodri ap Dyfrig 20 Gorffennaf 2012, 09:55

Os wnaeth y gig argraff arnoch chi beth am sgwennu brawddeg neu ddwy, neu roi llun neu fideo ar y wefan yma: http://hannercancofnod.wordpress.com/

Bydd Hanner Can Cofnod yn ceisio casglu 50 argraff neu pwt wedi eu ysbrydoli gan y gig.

Rhiwlyg 20 Gorffennaf 2012, 10:04

Ble oedd grwpiau’r 70au – y rhai oedd yn canu yn ystod cyfnod euraidd ein chwyldro? Y rhai oedd yn canu wrth i Dafydd a Ffred, Wynford a Rhodri ac eraill gael eu carcharu? Ble oedd Hergest, Ac Eraill, Mynediad am Ddim, Edward H? Clywais nad oedden nhw wedi derbyn gwahoddiad i fod yno. Mae hyn yn siomedig a braidd yn amharchus.
Roedd e’n benwythnos da ac yn ddathliad teilwng o gyfraniad y Gymdeithas. Ond roedd rhai pethau symol iawn yno. Gruff Rhys yn gwisgo dillad newydd yr ymherawdwr – gyrru, gyrru, gyrru! A Lovgreen – swn gwael, set gwaeth.
Uchafbwyntiau – egni’r Bandana, safon Jakakoyak, sioe Bryn Fon, neges oesol Tecs a swyn Fflur Dafydd.

Owain Sgiv 20 Gorffennaf 2012, 10:45

Fe wnaethon ni benderfyniad yn fuan iawn i beidio mynd ar ôl grwpiau i ail-ffurfio. Roedden ni am adlewyrchu’r sin fel y mae ar hyn o bryd a’r cyfoeth o artistiaid gwych sydd gennym yn perfformio ac yn rhyddhau cerddoriaeth ar hyn o bryd. Yr unig eithriad efallai oedd Tŷ Gwydr, ond roedd bachyn arbennig i hynny wrth ddathlu 20 mlynedd ers Noson Claddu Reu…ac roedden nhw’n awyddus iawn iawn i fod yn ran o’r peth!

Dwi’n meddwl bod gormod o duedd i rhamantu am y gorffennol weithiau yn hytrach na gwerthfawrogi’r hyn sydd gennym yn y presennol.

Diolch yn fawr iawn i bawb gefnogodd y digwyddiad a helpu profi bod y sin yn fyw ac yn iach.

Rhiwlyg 20 Gorffennaf 2012, 11:41

Ail-ffurfio? Maffia? Ail Symudiad? Gwn eu bod wedi canu’n lled ddiweddar ond mae hynny’n wir hefyd am Mynediad am Ddim, Hergest ac Edward H. Dadl denau iawn Owain. Mae gwahaniaeth rhwng rhamantu a dathlu trac sain y chwyldro. Yn anffodus tawelwyd can y 70au. Mae hynny’n drueni. Dyna oedd fy mhwynt.

Llywelyn 20 Gorffennaf 2012, 12:05

Penwythnos gret! Wir wedi mwynhau! Diolch yn fawr Hanner Cant am drefnu’r holl achlysur.

Owain Sgiv 20 Gorffennaf 2012, 12:53

Efallai mai’r gwahaniaeth mawr ydy bod pobl fel Ail Symudiad a Maffia wedi cysylltu’n gofyn am gael chwarae a bod yn rhan o’r digwyddiad arbennig yma.

Rhydd i bawb ei farn Rhiwlyg, a dwi’m yn mynd i fynd i ddadl am hyn, ond dwi’n hyderus nad oes unrhyw le i ni orfod cyfiawnhau y lineup. Mae cael y balans mewn digwyddiad fel hyn yn ddigon anodd, ond o’r adborth rydan ni wedi’i gael dwi’n reit siŵr ein bod ni wedi llwyddo i gael y balans yn iawn :-)

Awen Schiavone 20 Gorffennaf 2012, 13:00

Penwythnos hollol wych – diolch yn fawr iawn i’r trefnwyr – gwaith anhygoel! Dwi’n siwr bod dewis 50 o fandiau wedi bod yn waith anodd, ac mi fyddai nifer o bobl wedi hoffi gweld rhyw fand/artist (boed yn rhai cyfoes, neu o’r gorffennol) nad oedd yno – allwn ni ddim cael pob dim! Mae rhywun yn sylweddoli cymaint o fandiau sy’n bodoli mewn digwyddiad fel hwn, ond mi ddewiswyd yn ddoeth iawn yn fy marn i – gyda thrawsdoriad gwych o fandiau ac artistiaid o sawl degawd, ac o sawl genre gerddorol wahanol. Mi wnaethont yn dda i lwyddo i gynnwys cymaint o setiau yn yr amser cyfyngedig oedd ganddynt, a’r symud o set ar un llwyfan i’r llall yn llyfn ac effeithiol iawn – da iawn unwaith eto. Fel rhywun sydd wedi, ac yn parhau i fwynhau cerddoriaeth Gymraeg o bob genre ac o bob cenehedlaeth er dechrau canu pop, dwi’n falch iawn fy mod wedi cael bod yn rhan o gynulleidfa digwyddiad hanesyddol bwysig a llwyddiannus. Canmoliaeth mawr i’r trefnwyr, ac i’r holl wirfoddolwyr – mae cymdeithas yn fyw, mae’r iaith yn fyw, ac mae’r sin gerddoriaeth Gymraeg yn fyw!

Nia Mererid Owens 20 Gorffennaf 2012, 13:51

Roeddwn yn ffan mawr o’r sîn roc Gymraeg yn y saithdegau ond rwyn cytuno ag Owain nad oedd angen atgyfodi’r hen grwpiau ar gyfer Hanner Cant. Mae na fwy na digon o grwpiau ifanc cyfoes o safon sy’n haeddu cynulleidfa a chefnogaeth. Llongyfarchiadau a diolch yn fawr.

Rhiwlyg 20 Gorffennaf 2012, 14:09

Chi wedi camddeall fy nadl yn llwyr.

Y saithdegau oedd yr unig ddegawd i gael ei dangynrychioli. Meic, DI a Heather Jones o’r chwedegau. Tecs oedd yr unig un yno o’r 70au. Fe fyddai wedi bod yn braf gweld rhagor yno, dyna i gyd.

Cytuno gyda phawb arall – roedd e’n ddathliad teilwng o gyfraniad CyIG at hybu diwylliant Cymraeg.

Dyna fy ngair olaf ar y mater; sod ddis, dwi’n mynd i ymuno a’r Blaid Lafur!

Adam Jones 20 Gorffennaf 2012, 16:05

Rhiwlyg – Dathlu hanes y Gymdeithas oeddwn nid mynd yn ôl mewn hanes, cliw bach i chi – yr unfed ganrif ar hugain yw hi nawr nid y saithdegau. Roedd yn braf cael rhai o’r hen fawrion ond mae’n bwysig i ni hybu ac annog cerddoriaeth ifanc mwy cyfoes, i ddenu pobl ifanc o’m cenhedlaeth i, i fod yn rhan o’r mudiad. Chwyldro’r Gorffennol ddim yn ddigon i gyrchu chwyldro’r dyfodol mae arna i ofn, ac ni ddylwn diystyru’r cyfle hwn i weud diolch i Owain Schiavone a’i debyg am drefnu’r digwyddiad a gweithio’n ddiwyd at sicrhau mai penwythnos i ddathlu ydoedd, ac yn wir fe wnaethon nhw ddim siomi!!!!.

pleidleisiwr 20 Gorffennaf 2012, 21:05

sod ddis, dwi’n mynd i ymuno a’r Blaid Lafur!

Da iawn Rhiwlyg.

Mae nhw’n gaddo tywydd da wythnos nesa chan. Wyt ti am fynd i’r sioe frenhinol neu oes gan ti waith yn mynd ar ffordd? Os rwyt yn AC, nid oes rhaid i ti boeni am fynd i’r gwaith os oes gen ti rywbeth gwell i’w wneud. :)

slim goru 21 Gorffennaf 2012, 09:55

Gret for gig hanner can’t di mynd yn dda. Gresyn nad yw’r Gymdeithas yn trefnu gigs ar hyd y flwyddyn. Prin iawn yda nhw di mynd. A beryg sa raid chi fynd i Gaernarfon, Caerdydd neu Aberystwyth i’w gweld. Pobl ifanc yn gorfod neud ymdrech i ddod i adnabod y sin dyddie yma.
Be ddaw o’r sin? Tyfu? Sori, ond dydy 1500 o bobl ddim yn lot o styried ’maint’ y dathliad. Rhaid i’r sin gael llawer mwy o gefnogaeth os ydi hi’n parhau i dyfu. Mae na hefyd chydig bach o obsesiwn am nostalgia’r saithdegau di bod ers sawl blwyddyn ar Radio Cymru . Dydi’r orsaf methu mynd am ddiwrnod heb son am y cyfnod, neu chware lot fawr o Edward H……. Sa’n dda gen i weld S4C yn ail ffurfio y gyfres Fideo 9 – mae’r sin angen llawer mwy o gefnogaeth gan y cyfryngau, ac mae angen mwy o drefnwyr gigs! Fedra ni ddim forded aros 50 mlynedd i weld os fydd 1500 o bobl yn troi fyny i ddathlu’r sin ac i fod yn nostagic am fandiau sydd wedi chwalu. Mi ddylia ni fod yn gallu trefnu gig o’r maint yma yn flynyddol gyda bandiau newydd.

Bethan Williams 23 Gorffennaf 2012, 13:43

Slim Goru – Cytuno fod angen trefnu mwy o gigs a’u bod nhw’n cael eu cynnal mewn gwahanol lefydd, ond mae’n anodd cadw i drefnu gigs a chael rhyw 30 yn dod.
Mae’n amhosibl talu costau heb son am wneud elw ar gyfer gigs eraill. Er mai cyflwyno cerddoriaeth ac adloniant – a neges wleidyddol mewn gigs Cymdeithas, yw bwriad gigs mae’n rhaid talu am bopeth. Fe wnaeth yr Ods ddweud iddyn nhw gynnal eu taith ddiweddar ar golled,
Er tegwch i artistiad, pobl sain ayb mae’n rhaid gallu cynnig tal da iddyn nhw yn lle disgwyl iddyn nhw chwarae yn rhad am bod niferoedd yn isel; ac os yw costau tocynnau yn uchel er mwyn talu costau mae pobl yn llai tebygol byth o ddod.
Er hynny mae’n rhaid canmol rhan fwya bandiau’r sin am barhau i chwarae ac mae’n braf gweld bandiau newydd, ifanc yn dal i greu cerddoriaeth.

Mae’r sylwadau wedi cau.

1,500 yn Gig Hanner Cant

Cymdeithas yr Iaith yn hawlio ‘llwyddiant ysgubol’

Poblogaidd

Swyddi

Cynorthwyydd Tîm (Y Ganolfan Wasanaeth) (1 FTE)

Penodi Aelod Bwrdd

Swyddog Llywodraethiant

Rheolwr Gwasanaeth Llyfrgelloedd

Swyddog Cyfryngau C21

Rheolwr Prosiect

Pennaeth Cyfathrebu ac Ymgysylltu

Is Arweinydd De Cymru E-sgol

← Stori flaenorol

CYMBAC yn y COVID!

Stori nesaf →

❝ Taith o’r Llyfrgell efo Fflur Dafydd

Hefyd →

Galw am fuddsoddiad i wella gofal llygaid

13 sylw