Archesgob Cymru, Barry Morgan
Mae Archesgob Cymru wedi galw ar bobol i garu ei gilydd a herio anghyfiawnder a rhyfel, yn ei neges ar Sul y Pasg.
Dywedodd fod Duw wedi rhoi sêl bendith i ffordd Iesu Grist o fyw drwy ei atgyfodi.
“Roedd yr atgyfodiad yn dangos fod Duw yn dweud ‘ie’ i sut yr oedd Iesu yn byw ei fywyd,” meddai.
“Pe bai Duw wedi atgyfodi y Brenin Herod neu Pontius Pilat fe fyddai wedi dilysu tueddiadau gwaethaf y ddynoliaeth.
“Ond wrth atgyfodi Iesu dilysodd ei werthoedd Ef, sef maddeuant, trugaredd, a gorfoledd gwasanaethu.
“Roedd Iesu yn gwahodd pobol i’w ddilyn Ef, hyd yn oed os oedden nhw wedi syrthio’n ddwfn i mewn i bechod.
“Does neb, beth bynnag eu pechodau, y tu hwnt i’w gariad Ef.
“Mae Iesu yn addewid i ni fod cariad yn bwysicach na marwolaeth ac nad yw’r Creawdwr wedi troi cefn ar ei fyd.
“Mae wedi ysgwyddo baich poen a chywilydd y byd a chreu rywbeth newydd.
“Rhaid i ni weithredu yn erbyn newyn, rhyfel, trais ac amddifadedd – pethau sy’n difetha delwedd Duw ac yn anffurfio ei fyd.”
