Porthmadog
Mae dyn a dynes yn yr ysbyty yn dilyn digwyddiad yn Harbwr Porthmadog neithiwr.
Am 8.40 yr hwyr, derbyniodd yr heddlu adroddiadau fod dynes yn y dŵr yn yr harbwr a bod dyn ifanc lleol a geisiodd ei helpu hefyd mewn trafferthion yn y dŵr.
Fe’u hachubwyd gan swyddog yr heddlu gyda chymorth criw’r bad achub lleol.
Cludwyd y dyn lleol 24 oed a’r ddynes 45 oed i Ysbyty Gwynedd lle maen nhw’n derbyn triniaeth am hypothermia.
Mae rheolwr gweithredol Gorsaf Bad Achub Cricieth, Peter Williams, wedi canmol y dyn wnaeth geisio achub y ddynes, a’r swyddog yr heddlu am eu dewrder.
Dyw’r ddau ddim wedi cael eu henwi a does dim mwy o wybodaeth ar hyn o bryd.
