Mwyafrif Cymru ‘o blaid Tîm Pêl-droed GB’

Aaron Ramsey Llun: fourfourtwo.com
Mae dros ddwy ran o dair o bobol Cymru yn credu y dylai peldroedwyr Cymru chwarae i Dîm Pêl-droed Prydain Fawr yn y Gemau Olympaidd, yn ôl arolwg diweddar.

Mae 69% o bobol Cymru yn credu y dylai chwaraewyr pêl-droed Cymru chwarae dros dîm GB yng Ngemau Olympaidd 2012, yn ôl ffigyrau arolwg barn YouGov, a gomisiynwyd gan raglen y Byd ar Bedwar.

Cafodd mil o bobol eu holi am greu tîm pêl-droed unedig i Brydain Fawr ar gyfer Gemau Olympaidd Llundain, a dim ond 10% o’r rhai a holwyd oedd yn erbyn gweld chwaraewyr Cymru yn ymuno â’r tîm.

Daw’r ffigyrau diweddaraf yn dipyn o syndod i nifer ar ôl i chwaraewyr Cymru sydd eisoes wedi dangos awydd i ymuno â’r tîm gael eu beirniadu’n chwyrn gan lawer o gefnogwyr yn ystod yr wythnosau diwethaf.

Yn gynharach yn y mis, fe gyhoeddodd Aaron Ramsey, Capten Cymru, a Gareth Bale, Chwaraewr y Flwyddyn Cymru, eu bod ill dau yn awyddus i ymuno â ‘Tîm GB’ ar gyfer twrnament pêl-droed y Gemau Olympaidd.

Mae’r cyhoeddiad gan y ddau wedi cael ei feirniadu’n hallt gan nifer o gefnogwyr, gyda llawer yn eu cyhuddo o fod yn “hunanol” am gymryd cam a allai, yn ôl Cymdeithas Bêl-droed Cymru, gyfaddawdu annibyniaeth y tîm cenedlaethol.

Bydd y mater yn cael ei drafod ymhellach ar y Byd ar Bedwar heno, mewn rhaglen arbennig fydd yn trafod sefyllfa tîm pêl-droed Prydain Fawr ar gyfer y Gemau Olympaidd, ac yn edrych yn ôl dros gêm fawr y penwythnos rhwng timau pêl-droed Abertawe a Manchester United.

Bydd y Byd ar Bedwar yn cael ei ddarlledu ar S4C heno, am 9.30pm.

7 sylw

Eirion Rhys 21 Tachwedd 2011, 13:01

Dyw e ddim yn syndod yn y byd o ystyried bod polau piniwn y gorffennol wedi dangos bod mwayfrif y Cymry’n cefnogi Lloegr yn rowndiau terfynol Pencampwriaeth Ewrop a Chwpan y Byd a bod dim ond rhyw 10% o’r Cymry o blaid annybynniaeth ar y DU. Go brin y byddai mwyafrif yr Albanwyr yn gefnogi tim Prydeinig gan fod mwy ohonyn nhw o blaid annibyniaeth bellach nag sy yn ei herbyn hi.
Gyda llaw, onid Tim Prydain Fawr a Gogledd Iwerddon sy dan sylw?

Martin Davies 21 Tachwedd 2011, 13:04

Sut ddewiswyd y rhai a gafodd eu holi yn yr arolwg barn (mae’n ddrwg gen i, pol piniwn)? Os nad ydynt yn ymwybodol o gefndir y rheswm pam mae arolwg yn cael ei gynnal, mae’r ateb efallai yn gamarweiniol.

Wedi dweud hyn, oes yna wir berygl i Gymru golli ei hannibyniaeth beldroedaidd petai un neu ddau o Gymry yn chwarae peldroed yn y gemau Olympaidd?

Boi 21 Tachwedd 2011, 14:00

Mae hyn yn beryglus iawn i dím pel-droed cenedlaethol Cymru. Pobl sy’n gwybod dim am y sefyllfa ac efallai’n cymryd dim sylw o bel-droed, yn rhoi barn ar ddyfodol ein tim cenedlaethol.

Cymdeithas Bel-droed Cymru, Ian Gwyn Hughes, byddwn yn gadarn ac yn ddewr. Peidiwch rhoi fewn. Fel y diweddar Alun Evans o’ch blaen, cewch lot o bwysau o du’r wasg – a BBC ‘Cymru’ hefyd – ond daliwch eich tir. Fydd Cymru’n deall ac yn diolch maes o law.

Neilyn 21 Tachwedd 2011, 17:13

Mwyafrif o bobol Cymru o blaid – digon posib.

Ond oes rhywun wedi meddwl am farn Y Cymry?

Dim ond gofyn.

Aled Edwards 21 Tachwedd 2011, 20:49

O’r hyn a welir, ymddengys hwn fel un o’r polau hynny sy’n gwahodd ateb o’r fath? Wedi’r cwbl, pam y dylid camwahaniaethu yn erbyn pêl-droedwyr Cymreig os oes “TeamGB” i’w gael?

Dyma gwestiwn dilys i’w ofyn: a ydych fel cefnogwyr tîm pêl-droed Cymru am golli eich tîm cenedlaethol ?

Gwilym Prydderch 22 Tachwedd 2011, 12:38

Cytuno efo’r teimladau uchod. Cefnogwyr pêl-droed Cymru y dylid eu holi, nid Cyrnol Ponsonby-Smythe o Abersoch a’i fath. Mae fel gofyn fy marn i am ddyfodol tîm gwau sanau Lloegr.
Ac onid ydy hi’n ffars meddwl gwahodd Gogledd Iwerddon i anfon eu chwaraewyr i garfan Tîm GB pan nad ydy’r rhan honno o Iwerddon hyd yn oed yn rhan gyfansoddiadol o wladwriaeth Prydain Fawr?

Eirion Rhys 22 Tachwedd 2011, 18:31

P’un a ydyn ni’n cytuno a’r peth neu beidio, mae Gogledd Iwerddon yn rhan o Deyrnas Unedig Prydain Fawr a Gogledd Iwerddon. Beth sy’n ddiddorol yw, er bod y tim Olympaidd wedi mabwysiadu’r talfyriad mwy cynhwysol, ‘GB & NI’, y tro diwetha, mae’r holl son y tro yma am ‘Team GB’…

Mae’r sylwadau wedi cau.

Mwyafrif Cymru ‘o blaid Tîm Pêl-droed GB’

69% o bobol Cymru yn credu y dylai chwaraewyr pêl-droed Cymru chwarae dros dîm GB yng Ngemau Olympaidd 2012

Poblogaidd

Swyddi

Hwylusydd Prosiect

Asesydd Allanol – Iechyd a Gofal Cymdeithasol CC (Cymraeg yn Ddymunol)

Arolygydd Eiddo – Siaradwr Cymraeg

Is-ddatblygwr Meddalwedd

Swyddog Ardal Wledig (Dyffryn Conwy)

← Stori flaenorol

Caerdydd v Fulham: yr Adar Gleision am fanteisio ar fod y gwannaf o’r ddau dîm

Stori nesaf →

Crynhoi’r Uwch Gynghrair 18-20/11/2011

Hefyd →

Galw am yr hawl i ddewis olynwyr i wleidyddion sy’n cael eu symud o’u swyddi

7 sylw