Mae ffigurau marwolaethau coronafeirws y Swyddfa Ystadegau 61% yn uwch na ffigurau Iechyd Cyhoeddus Cymru.
Y ffigwr swyddogol hyd at Ebrill 17 – gan gynnwys y rhai oedd wedi’u cofrestru hyd at Ebrill 25 – oedd 1,016.
Ond yn ôl Iechyd Cyhoeddus Cymru, 632 o bobol yw’r ffigwr.
Mae ffigurau’r Swyddfa Ystadegau hefyd yn cynnwys y rhai fu farw yn eu cartrefi, mewn cartrefi gofal ac mewn hosbisau, ac nid dim ond mewn ysbytai.
Y sefyllfa yn Lloegr
Mae yna wahaniaeth sylweddol yn ffigurau Lloegr hefyd.
Ond yn y fan honno, mae ffigurau’r Swyddfa Ystadegau’n cynnwys unrhyw sôn am y coronafeirws ar dystysgrifau marwolaeth, gan gynnwys achosion tybiedig, yn ogystal â ffigurau marwolaethau yn y gymuned.
Mae cyfanswm o 24,243 o bobol wedi marw yn sgil y coronafeirws yng ngwledydd Prydain, yn ôl ffigurau marwolaethau sydd wedi’u cofrestru.
Cafodd 22,351 o farwolaethau coronafeirws eu cofrestru yng Nghymru a Lloegr hyd at Ebrill 25.
1,616 yw’r ffigwr yn yr Alban hyd at Ebrill 19, tra bod 276 o farwolaethau yng Ngogledd Iwerddon hyd at Ebrill 22.
