Mae teulu’r diweddar Brooke Morris, a gafodd ei darganfod yn farw ar ôl bod ar goll am sawl diwrnod, wedi diolch i bawb a fu’n chwilio am y “ferch anhygoel”.
Cafodd corff y ferch, 22, o Drelewis ei ddarganfod yn afon Taf ger Abercynon yr wythnos ddiwethaf (dydd Mercher, Hydref 16).
Doedd neb wedi ei gweld hi oddi ar y nos Sadwrn cynt (Hydref 12) ar ôl noson mas yn nhref Merthyr Tudful.
Yn ôl Heddlu De Cymru, maen nhw’n dal i ymchwilio i achos ei marwolaeth sydd ar hyn o bryd yn anesboniadwy.
Mewn teyrnged, dywed teulu Brooke Morris fod cefnogaeth y gymuned leol wedi eu helpu i “fagu cryfder yn ystod cyfnod hynod o anodd”.
“Mae hi wedi gadael gwaddol arbennig”
“Er nad yw Brooke gyda ni mwyach, mae hi wedi gadael gwaddol arbennig,” meddai’r teulu mewn datganiad.
“Fe lwyddodd Brooke i ddod â chymaint o bobol yn yr ardal leol ynghyd, ac mae’r ysbryd cymunedol yr ydym ni wedi ei weld yn ddiweddar wedi cyffwrdd â ni’n fawr.
“Diolch i bawb o waelod calon a fu’n helpu i chwilio am Brooke. Allwn ni ddim peidio â chyfeirio at gefnogaeth Clwb Rygbi Nelson, y Nelson Belles, Clwb Rygbi Treharris a Thîm Achub Mynydd y Bannau.
“Rydym hefyd yn ddiolchgar i fusnesau lleol sydd wedi rhoi rhoddion hael a hoffwn hefyd ddiolch i elusen 2 Wish Upon a Star am eu cefnogaeth.
“Fydd bywyd heb Brooke ddim yr un fath, ond mae’r atgofion hapus sydd gennym ni ohoni yn rhyw fath o gysur yn ystod y cyfnod poenus hwn.
