Prif Weinidog Samoa yn dweud ei ddweud

Tydi Prif Weinidog Samoa ddim yn ddyn hapus.

Mae Tuilaepa Sailele Malieiagaoi wedi beirniadu’r bwrdd rheoli rygbi rhyngwladol (yr IRB) am ganiatáu i Gymro i ddyfarnu’r gêm rhwng Samoa a De Affrica yr wythnos ddiwethaf. Nigel Owens oedd y dyfarnwr yn y gêm wnaeth Samoa golli, sy’n golygu mai Cymru aeth drwodd i’r rownd go-gynderfynol.

Mae’r Prif Weinidog hefyd wedi cyhuddo’r corff rheoli o ragfarn tuag at hemisffer y gogledd a galwodd am dîm Llewod Prydeinig i gymryd lle Lloegr, Cymru a’r Alban yng Nghwpan y Byd.

Nid y Prif Weinidog oedd yr unig un i deimlo’n anhapus am y sefyllfa. Mi wnaeth canolwr Samoa, Eliota Fuimaono Sapolu, gyhuddo Owens o hiliaeth tra’n trydar, ac o’r herwydd cafodd ei atal rhag chwarae unrhyw rygbi am gyfnod amhenodol.

Mae’r Prif Weinidog wedi rhestru 12 penderfyniad gan Owens y mae’n honni aeth yn erbyn Samoa, gan cynnwys cerdyn coch i’r cefnwr Paul Williams.

Dywed y dylai dyfarnwyr niwtral gael eu defnyddio yng Nghwpan y Byd 2015 yn Lloegr, ac y dylai pob tîm gael gorffwys am saith niwrnod rhwng pob gêm.

8 sylw

Anwybodaeth Gwarthus 8 Hydref 2011, 13:59

Mae sylwadau Malieiagaoi yn dangos anwybodaeth anhygoel, ac ynghyd a sylwadau Sapolu, maen’t mewn perygl o droi y farn gyffredinol fod triglion Samoa yn bobl gul, anwybodus ac yn gollwyr gwael, sydd yn hollol i’r gwrthwyneb i’w delwedd fel tras heddychlon, groesawgar. Mae’r holl beth yn warthus.

Mae’r awgrymiad y dylai carfan y Llewod gynrychioli Cymru, Yr Alban a Lloegr yn hollol chwerthinllyd. Efallai y gallem awgrymu y dylai Samoa uno gyda Awstralia neu Seland Newydd neu (o gofio eu hanes gweleidyddol) yr Almaen neu U.D.A. hyd yn oed!

Iestyn 8 Hydref 2011, 14:50

Ydw i’n gywir i ddweud y byddai Samoa wedi gorfod curo De Affrica o 43 pwynt er mwyn cymryd eu lle nhw yn y chwarteri? Oce, fyddai hynny wedi gorfodi i Gymru chwarae Awstralia, a falle bod gwell gyda Nigel Owens, yn ei galon, fod Cymru yn chwarae’r Iwerddon, ond 12 penderfyniad yn costio 50 pwynt? Beth yw Scersli Bilîf yn iaith Samoa?

Dylan Llyr 8 Hydref 2011, 15:26

A bod yn deg mae ganddo bwynt. Mae’n rhyfedd bod Cymro wedi dyfarnu gêm lle roedd y canlyniad yn cael effaith mor sylweddol ar Gymru.

Mae’r gweddill yn nonsens wrth gwrs.

CGT 8 Hydref 2011, 15:34

Dyna un o wendidau mawr rygbi. Dim ond ychydig iawn o ddyfaranwyr rhyngwladol sydd yna. e.e. , serch fod yr Ariannin a’r Eidal bellach yn wledydd cystadleuol , pryd welwyd dyfranwyr o’r ddwy wlad mewn gemau mawr ?
Mae’r ‘pool’ o ddyfranwyr yn dod o ychydig iawn, iawn o wledydd . Maen cystadleuaeth agored , fel cwpan peldroed y byd ,
daw y dyfarnwyr o bob rhan o’r byd.Ochr arall y geiniog yw fod rhai o’r rhain yn wael iawn.
Buasai hyfforddi dyfarnwyr o Samoa i safon uchel yn lleihau’r elfen dreisgar sydd yn gynhenid i’w chwarae.

Neilyn 8 Hydref 2011, 15:47

“The biggest facade in world rugby is how the IRB and British unions managed to pull the wool over our rugby eyes that England, Wales and Scotland are different countries” – Prif Weinidog Samoa

Erbyn 2015 pan fydd Cwpan Rygbi’r byd yn cael ei chynnal unwaith eto, yn Lloegr fel mae’n digwydd, a fydd yr Alban wedi pleidleiso o blaid annibyniaeth, yn erbyn annibyniaeth, neu heb bleidleisio (eto) o gwbwl?

Pwy a wyr, ond mae’n rhaid i bob Cymro a Chymraes gonest deimlo rywfaint o gydymdeimlad gyda safbwynt y Prif Weinidog ar y pwynt yma, does bosib, yn enwedig y rheini sydd yn bendant yn erbyn annibyniaeth i Gymru, yn enwedig os bydd yr Alban o leiaf yn dewis ‘bod yn genedl’ unwaith eto.

Mr Cameron – be amdani? ydi Lloegr yn wlad neu ddim?!

Russ 9 Hydref 2011, 01:12

Pethau waeth yn digwydd yng Nghymru. Dyfarnwr o Gastellnedd am gem rhwng Castellnedd v Casnewydd, dyn oedd yn cael tocyn tymor Pontypridd yn gwneud 2 gem mewn un tymor Pontypridd v Casnewydd….

Martin Davies 10 Hydref 2011, 11:22

Rhaid cytuno a rhai o’i bwyntiau.
‘Doedd cael dyfarnwr o Gymro mewn gem mor dyngedfennol ddim yn drefniant derbyniol – roedd unrhyw benderfyniad dadleuol gan Nigel Owens yn sicr o gael ei feirniadu gan y collwyr, pwy bynnag oeddynt (er, yn fy marn i, Nigel Owens yw un o’r dyfarnwyr gorau yn y gystadleuaeth – drueni na fydd yn cael dyfarnu yn y gem derfynol – gobeithio!).

Ond, yn waeth o lawer na’ hynny, anheg a dweud y lleia’ oedd y pedwar diwrnod rhwng gemau a gafodd Samoa – ac eraill (y gwledydd llai i gyd) – tra chafodd Cymru a De’r Affrig chwech neu saith diwrnod rhwng gemau pwysig.

Rhaid i bopeth fod yn deg a diduedd neu mi fydd y drefn yn siwr o gael ei feirniadu.

Martin Davies 10 Hydref 2011, 11:30

Newydd ail-ddarllen yr adroddiad a sylwi ar y geiriad anffodus:

“Nigel Owens oedd y dyfarnwr yn y gêm wnaeth Samoa golli, sy’n golygu mai Cymru aeth drwodd i’r rownd go-gynderfynol”

Mae hynny yn dweud mawr, ac yn anghywir.

Mae’r sylwadau wedi cau.

Prif Weinidog Samoa yn dweud ei ddweud

Nigel Owens a’r IRB o dan y lach gan Brif Weinidog Samoa

Poblogaidd

Swyddi

Arolygydd Eiddo – Siaradwr Cymraeg

Is-ddatblygwr Meddalwedd

Pennaeth Cwynion Gwasanaethau Cyhoeddus

Swyddog Ardal Wledig (Dyffryn Conwy)

Comisiynwyr/ Aelodau Bwrdd i Gomisiwn Dylunio Cymru

← Stori flaenorol

Cefnogwr Caerdydd yn canmol rheolwr Abertawe

Stori nesaf →

Y Prif Weinidog yn canmol y dewrion

Hefyd →

Tynnu Plas Tan-y-Bwlch oddi ar y farchnad agored am gyfnod

8 sylw