Oes o garchar i ddyn am ladd ei gymydog ym maes carafanau Pentywyn

Mae dyn wedi ei garcharu am oes ar ôl llofruddio ei gymydog mewn maes carafanau yn Sir Gaerfyrddin.

Cafodd Simon Clark, 54, ei drywanu i farwolaeth gan Steven Baxter, 52, ym Mharc Carafanau Grove, Pentywyn – lle’r oedd y ddau yn byw – ar Fedi 27 y llynedd.

Cafwyd Steven Baxter yn euog o lofruddiaeth yn Llys y Goron Abertawe ddoe (dydd Llun, Ebrill 8), ac fe fydd yn gorfod treulio isafswm o 24 mlynedd o dan glo.

Cafodd Simon Clark ei drywanu yn ei frest cyn i’w gorff gael ei ganfod y diwrnod canlynol. Daethpwyd o hyd i Steven Baxter yn cuddio ar draeth yn Sir Gaerfyrddin bron i fis yn ddiweddarach ar Hydref 27.

Roedd Jeffrey Ward, 40, a oedd hefyd yn byw yn y maes carafanau, wedi ei gyhuddo o lofruddio, ond fe’i cafwyd yn ddieuog gan y rheithgor.

Ond mae ei bartner, Julie Harris, 46, wedi ei dedfrydu i 14 mis o garchar, wedi ei ohirio am ddwy flynedd, ar ôl iddi bledio’n euog i wyrdroi cwrs cyfiawnder mewn cysylltiad â’r farwolaeth.