Comisiynydd Heddlu’r Gogledd yn gwahodd Jeremy Vine i Gymru

Mae Comisiynydd Heddlu Gogledd Cymru a chynghorydd tref o Gaernarfon wedi estyn gwahoddiad i’r cyflwynydd radio Jeremy Vine i ddod i Gymru.

Daeth y gwahoddiadau oddi wrth Arfon Jones, Wrecsam ac Ann Hopcyn, aelod Plaid Cymru ar Gyngor Tref Caernarfon yn dilyn ymateb Mr Vine i ffrae iaith, lle ymddengys iddo gymharu’r Gymraeg â iaith dramor.

Ysgogodd hynny ymateb chwyrn gan ddwsinau o bobl ar y cyfryngau cymdeithasol.

Ers hynny mae Mr Vine syrthio ar ei fai.

Ddoe, fe heriodd Siân Gwenllian, Aelod Cynulliad Plaid Cymru Arfon, iddo ddod i Gymru.

“Efallai y byddwch yn gweld wedyn pam fod eich sylwadau diweddar am yr iaith Gymraeg yn sarhaus dros ben i’n hunaniaeth, ein diwylliant a’n ffordd o fyw,” mrddai.

Heddiw, estynodd Mr Jones wahoddiad i Mr Vine i ymweld ag yntau.

Dechreuodd y drafodaeth ar ôl i Fanc Lloyds yn wreiddiol wrthod derbyn siec Gymraeg wedi’i hysgrifennu gan Gyngor Tref Aberteifi.

Ar ei raglen radio BBC, holodd Vine wrandawr o Bontypridd a ddywedodd fod siaradwyr Cymraeg “yn meddwl eu bod yn well nag unrhyw un arall.”

Dywedodd y dyn: “Os ewch chi i unrhyw dafarn yng ngorllewin Cymru . . . yng ngogledd Cymru, mae nhw i gyd yna yn siarad Saesneg, ond cyn gynted a mae nhw yn dod mewn a chlywed fy acen i – mae nhw yn dechrau newid i’r Gymraeg, fel na allwn ni eu deall nhw.

Cafodd y rhaglen ei beirniadu gan ddwsinau o bobl oedd yn honni fod y sylwadau gwrth-Gymreig yn “nonsens”.

Dywedodd un, William Jones, ar ei gyfrif Trydar: “Fe gerddais i mewn i dafarn ym Mharis yr wythnos cyn y Nadolig . . . pwy ‘fasa’n meddwl, Ffrancwyr yn siarad Ffrangeg yn Ffrainc.”

Fe ymatebodd Vine gan ofyn: “Ydi Ffrainc yn y Deyrnas Gyfunol”.

Wrth amddiffyn ei hun, dywed Jeremy Vine nad oedd e’n cymeradwyo’r stori am bobol yn troi i siarad Cymraeg mewn tafarn – honiadau sy’n cael eu gwneud yn aml gan bobol ddi-Gymraeg.

Yn ei ymateb i Ms Gwenllian dywedodd Mr Vine: “Am nad yw’n glir o’r sgwrs hon, Sian, ga i dynnu sylw at y ffaith na wnes i adrodd y stori wreiddiol am siaradwyr Cymraeg yn y dafarn, nac wedi ei chymeradwyo.

“Dim ond cwestiynu roeddwn i a oedd y gymhariaeth â Paris/Ffrainc o gymorth.

“Wnes i ddim dewis fy ngeiriau’n dda iawn, mae’n amlwg.”

Mae Mr Vine hefyd wedi diolch i’r ymgyrchydd iaith Gymraeg Aran Jones am ei gefnogaeth iddo. Mewn erthygl ar Say Something in Welsh, dywed Mr Jones fod Mr Vine wedi dangos diddordeb mewn dysgu Cymraeg. Apeliodd Mr Jones hefyd i Gymry beidio bod mor ymosodol ond yn hytrach feithrin cariad pobl eraill at ein hiaith.

Dywed Mr Jones: “Hwyrach os fydde ni yn treulio mwy o amser yn lledaenu’r cariad a gwneud ffrindiau, yn gwahodd pobl i fewn i’n hiaith a’n diwylliant cyfareddol ac unigryw – hwyrach fe fyddai gennym ni lai o ymosodiadau i ddelio a nhw.

“Felly, hwyrach y dyla ni stopio gwaeddi arno fo.”