Bag Mistar Urdd yn gwerthu fel fflamiau yn Llanelwedd

Bag yn siâp Mistar Urdd ydi un o’r nwyddau sydd wedi profi fwya’ poblogaidd ar faes Eisteddfod yr Urdd yn Llanelwedd eleni.

Mae’r bag, sy’n costio £15, i’w weld ar ysgwyddau plant trwy gydol yr wythnos, ac yn ôl siop y mudiad ar y maes, maen nhw wedi gwerthu bron 500 ohonyn nhw hyd yn hyn.

Eisteddfod Brycheiniog a Maesyfed yw ymddangosiad cynta’r bag, ac mae wedi’i ddylunio gan Swyddog Marchnata’r Urdd, Branwen Rhys, a’i gynhyrchu gan y cwmni o Gaerdydd, The Publicity Centre.

“Ailwampio tegan Mistar Urdd”

“Fe wnaethom ni benderfynu y llynedd bod angen ailwampio tegan Mistar Urdd, ac i wneud o i edrych yn debycach i’r masgot ei hun,” meddai Branwen Rhys wrth golwg360.

“Yn dilyn o hynny, ro’n i’n licio’r syniad o gael mwy o nwyddau efo Mistar Urdd arnyn nhw, felly fe wnes i ryw sgets bach o fag Mistar Urdd a chydweithio â’r un cwmni wnaeth gynhyrchu tegan Mistar Urdd, ac maen nhw wedi profi i fod yn hynod boblogaidd hyd yma.”