Gohirio datblygu cymhwyster TGAU Iaith Arwyddion Prydain yn “benderfyniad siomedig iawn”

Mae gohirio datblygu cymhwyster TGAU Iaith Arwyddion Prydain yng Nghymru’n “benderfyniad siomedig iawn”, yn ôl Comisiynydd Plant Cymru.

Daw ei sylwadau ar ôl i gorff Cymwysterau Cymru gyhoeddi eu bod nhw wedi penderfynu oedi cyn datblygu cymhwyster TGAU Iaith Arwyddion Prydain o ganlyniad i heriau ymarferol.

Roedd bwriad i gyflwyno’r cymhwyster newydd yn 2027, fel modd i ddysgwyr gael mynediad at sgiliau Iaith Arwyddion Prydain ac i gyfathrebu â’r gymuned Fyddar.

Mewn datganiad, dywed Cymwysterau Cymru y bydd cymhwyster tebyg ar gael i ddisgyblion mewn Iaith Arwyddion Prydain.

Bydd cymhwyster Sgiliau Bywyd newydd i ddysgwyr 14-16 oed yn cyd-fynd â Chwricwlwm newydd Cymru.

‘Siom’

Mae’r penderfyniad i ohirio datblygiad y cymhwyster wedi arwain at “siom” ymhlith elusennau a’r gymuned Fyddar.

“Mae’n amlwg bod hwn yn benderfyniad siomedig iawn i bobol ifanc Fyddar yng Nghymru,” meddai Rocio Cifuentes.

“Byddaf yn ysgrifennu ar frys at Gymwysterau Cymru a Llywodraeth Cymru i fynegi fy mhryder, ac i ofyn pa asesiad sydd wedi’i wneud o hawliau ac anghenion plant Byddar wrth wneud y penderfyniad, ac i bwyso am ffordd glir ymlaen, fel bod atebolrwydd a chefnogaeth i blant Byddar a’u teuluoedd.”