Mae dyn 19 oed o Abertawe wedi’i garcharu ar ôl pledio’n euog i droseddau brawychol.
Aeth Alex Hutton gerbron Llys y Goron Winchester yn dilyn ymosodiad ar sail y ffaith fod y ddioeddfwraig yn ddynes drawsryweddol.
Cafodd ei arestio gan Heddlu’r De fis Tachwedd y llynedd, a’i gael yn euog o droseddau o dan y Ddeddf Derfysgaeth, ar ôl iddyn nhw gael gwybod gan aelod o’r cyhoedd fod ganddo fe fideo ar Instagram yn honni iddo gicio unigolyn yn y pen.
Roedd y fideo hefyd yn cynnwys delweddau’n ymwneud â’r asgell dde eithafol.
Mae wedi’i garcharu am bum mlynedd a phedwar mis.
Mae Pennaeth Ymchwiliadau Plismona Gwrth-derfysgaeth Cymru wedi croesawu’r ddedfryd am “ymosodiad erchyll heb bryfociad ar ferch ifanc ddiamddiffyn oedd yn meindio’i busnes ei hun ryw brynhawn mewn parc yn Abertawe fis Mai 2023”.
Dywed y bydd yr ymosodiad yn cael effaith hirdymor arni, a bod y diffynnydd wedi dangos “bwriad clir i ledaenu ei atgasedd ar draws y rhyngrwyd”.
Arweiniodd yr ymchwiliad at gael gwybod am yr ymosodiad, meddai.
Dywed Gwasanaeth Erlyn y Goron fod Alex Hutton “nid yn unig yn ffantasïwr â safbwyntiau eithafol, ond mae hefyd yn ddyn ifanc peryglus”.
Mae’r heddlu wedi croesawu’r ddedfryd am “drosedd gasineb dreisgar ddi-synnwyr”.
