Hapusrwydd, nerfusrwydd a rhyddhad – dyma rai o’r emosiynau oedd i’w gweld yn Ysgol Bro Edern yng Nghaerdydd wrth i’r disgyblion dderbyn eu canlyniadau heddiw.

Aeth golwg360 draw i’r ysgol yn y brifddinas fore heddiw (dydd Iau, Awst 15), lle’r oedd nifer o’r disgyblion eisoes wedi derbyn e-bost neu neges destun yn cadarnhau eu lleoedd mewn prifysgolion.

Ar draws Cymru, mae miloedd o ddisgyblion wedi derbyn eu canlyniadau Safon Uwch, Uwch Gyfrannol, galwedigaethol a Bagloriaeth Cymru.

Fe wnaeth 10.1% ennill gradd A*, a 29.9% wedi ennill gradd A* i A.

Mae 97.4% o ddisgyblion ledled y wlad wedi ennill graddau A* i E.

Dyma’r tro cyntaf i’r canlyniadau gael eu dyfarnu yn yr un modd ag yr oedden nhw cyn y pandemig.

Ond beth oedd gan ddisgyblion a Phrifathro Ysgol Bro Edern i’w ddweud am y canlyniadau?

“Roeddwn i’n teimlo’n nerfus iawn, ond rŵan dwi’n teimlo wedi rhyddhau,” meddai Nia wrth golwg360, a hithau’n bwriadu mynd i Brifysgol Caergrawnt i astudio Seicoleg.

“Fi’n credu oedd rhai o’r arholiadau ddim y gorau, yn enwedig Mathemateg. Mi roedd pawb wedi gweld o fel yna.

“Oedd y rai arall yn oce fi’n credu, ond ti byth wir yn gwybod sut wyt ti wedi gwneud tan ar ôl.”

Roedd Daniel yn yr ysgol i dderbyn ei ganlyniadau Hanes, Seicoleg, Daearyddiaeth a’r Fagloriaeth.

Cafodd y canlyniadau roedd e’n eu disgwyl, ac mae bellach yn “edrych ymlaen” at fynd i Brifysgol Caerwysg i astudio’r Gyfraith.

“Roedd e’n ocê, ond roedd gymaint o’r cyd-destun o’n i angen dysgu yn drwm,” meddai.

Roedd Melony, sy’n mynd yn ei blaen i astudio’r Gymraeg ac Addysg yng Nghaerdydd, yn wên o glust i glust wrth iddi ddweud bod ei chanlyniadau’n “dda” a’u bod nhw wedi mynd sut roedd hi wedi “disgwyl iddyn nhw fynd” – er bod yr arholiadau eu hunain wedi bod yn “anodd”, meddai.

Bydd Rhys yn mynd yn ei flaen i astudio Peirianneg Dylunio yng Ngholeg Imperial yn Llundain, ac mae’n dweud ei fod yn “hapus dros ben”.

Dywed ei fod wedi bod yn “poeni a meddwl lot dros y misoedd diwethaf”, ond ei fod bellach “yn edrych ymlaen at y cam nesaf”.

O safbwynt yr arholiadau eu hunain, dywed ei fod “yn ocê” efo pob dim, a bod “arholiadau wastad yn mynd i fod yn amser sy’n achosi straen”.

Dywed ei bod hi wedi gwneud “mwy o adolygu” nag y dylai hi fod wedi’i wneud, er mwyn sicrhau ei bod hi’n cael y graddau gorau.

Dywed fod ei chanlyniadau wedi bod “yn dda”, oedd yn “syndod” iddi ar ôl noson o ddiffyg cwsg oherwydd ei nerfau.

Ond dydy hi ddim yn gwybod ar hyn o bryd beth fydd ei cham nesaf yn y byd addysg.

“Fi ddim yn gwybod be’ fi eisiau gwneud, felly fi’n cymryd blwyddyn allan,” meddai.

‘Balch’

Iwan Pritchard, Pennaeth Ysgol Bro Edern

Mae Iwan Pritchard, Pennaeth Ysgol Bro Edern, yn falch o berfformiad y disgyblion eleni.

“Wel, oeddwn i ddim yn rhy siŵr be’ i ddisgwyl y bore ma, ond mae Blwyddyn 13 yn hapus iawn gyda’u canlyniadau, ac yn gyffredinol maen nhw wedi gwneud yn arbennig o dda,” meddai wrth golwg360.

Ychwanega ei fod “yn falch o ganlyniadau pob un ohonyn nhw”, a’u bod nhw i gyd yn barod i fynd i’r cam nesaf.

Wrth ymateb i’r newid strwythur yn yr arholiadau eleni, dywed Iwan Pritchard mai’r “diffyg sicrwydd” oedd y peth mwyaf anodd i ymdopi ag o.

“Roedd diffyg sicrwydd o ran be’ i ddisgwyl efo’r canlyniadau, a ddim yn hollol ymwybodol o’r gweithdrefnau a sut oedden nhw’n mynd i effeithio’r canlyniadau eleni,” meddai.

Mae Iwan Pritchard hefyd yn canmol y system addysg Gymraeg yng Nghaerdydd, yn enwedig i’r disgyblion oedd wedi ymuno yn hwyr trwy’r system drochi.

“Mae’r ffaith eu bod nhw wedi para drwy’r system ac wedi cael Lefel A ar ôl saith mlynedd yn hytrach nag ar ôl 14 yn glod i’r system addysg Gymraeg o fewn sir Caerdydd,” meddai.

Ychwanega ei fod yn “mawr obeithio y bydd y llwyddiant yna yn parhau ac y bydd addysg Gymraeg yn parhau i ffynnu yn y ddinas.”