Dyma gyfres newydd sy’n cael cip ar gartrefi rhai o wynebau adnabyddus Cymru. Y gyflwynwraig teledu a radio Nia Parry sy’n agor y drws i’w chartref yn Rhostryfan ger Caernarfon yr wythnos hon.
Er mai merch o Ynys Môn ydw i’n wreiddiol, o bentre’ Dwyran, cefais fy magu yn Llandrillo-yn-rhos, Sir Conwy. Ar ôl cyfnod yn byw yn Abertawe yn y Brifysgol, ac yna’n byw dramor yn Istanbul, symudais i Gaerdydd lle fues i’n byw am 13 o flynyddoedd. Yna daeth yr ysfa i symud yn ôl i’r gogledd i fagu plant a chael bod yn agosach at fy nheulu. Dw i bellach yn byw yn Rhostryfan tu allan i Gaernarfon efo fy ngŵr, Aled, a’n meibion Hedd, 13, a Tirion, 11.
![](https://golwg.360.cymru/ased/sites/2/2024/04/Parry-Aelwyd-machlud-dros-640x428.jpg)
Roedden ni’n awyddus i fyw yn y fro Gymraeg ac fe wnaethon ni syrthio mewn cariad efo’r tŷ a’r olygfa yma yn Rhostryfan. Rydan ni’n byw yma ers 14 o flynyddoedd rŵan a dw i wrth fy modd yma.
![](https://golwg.360.cymru/ased/sites/2/2024/04/Nia-Parry-Ar-yr-Aelwyd-1-y-gegin--640x480.jpg)
Hen fwthyn bach oedd y tŷ gwreiddiol ond cafodd sawl estyniad ei adeiladu ar y tŷ cyn i ni symud yma. Yna mi wnaethon ni benderfynu adeiladu estyniad arall er mwyn i’r stafelloedd gwely a stafell chwarae i’r plant fod yn un pen y tŷ ac mi wnaethon ni droi’r stafelloedd gwely yn yr hen ran yn swyddfa a stafell sbâr. Rydan ni hefyd wedi trawsnewid yr ardd yn llwyr i wneud o’n haws i ofalu amdano ac er mwyn creu lle i’r hogia chwarae pêl-droed!
![](https://golwg.360.cymru/ased/sites/2/2024/04/Parry-Aelwyd-hoff-gornel-Nia-640x853.jpg)
Un o fy hoff bethau am y tŷ ydy’r olygfa. Allan o bob un ffenest rydan ni’n gweld draw at y Fenai ac yn gweld Ynys Llanddwyn ar Ynys Môn. Ar ddiwrnodau braf a chlir rydan ni hyd yn oed yn medru gweld mynyddoedd Wiclo yn Iwerddon.
Rydan ni newydd adnewyddu’r gegin a thynnu wal i’r stafell drws nesa er mwyn creu cegin fawr efo ardal fwyta ac eistedd a dw i’n hoff iawn o’r stafell honno gan mod i rŵan yn cael cwmni tra dw i’n paratoi swper! Dw i wedi dewis papur wal sy’n fy ngwneud i wenu ac mae ’na le bach handi i ddawnsio yna hefyd!
![](https://golwg.360.cymru/ased/sites/2/2024/04/Parry-Aelwyd-ystafell-wely-640x853.jpg)
Dw i hefyd yn caru ein stafell wely. Yn wahanol i weddill y tŷ, mae’r stafell yn wyn i gyd – carped gwyn, waliau gwyn, gwaith celf gwyn, bleinds gwyn, dillad gwely gwyn. Y lle perffaith i fynd i wagio’r meddwl ac ymlacio ar ddiwedd dydd!
![](https://golwg.360.cymru/ased/sites/2/2024/04/Parry-Aelwyd-Llun-gan-Carys-640x396.jpg)
Yn fy swyddfa binc mae gen i bob math o drugareddau bach personol sy’n fy atgoffa i o bobl dw i’n eu caru, llefydd sy’n arbennig i fi ac adegau hapus yn fy mywyd. I rai pobl – geriach blêr ydyn nhw ond, i fi, maen nhw’n drysorau bach sy’n gwneud i mi deimlo’n hapus a llon. Maen nhw’n rhan fach o fy hanes i, yn adrodd stori. Hen ornaments Nain Sally a Taid Bob, het Nain Madge, cardiau gan ffrindiau, lluniau, cofroddion llawn atgofion.
![](https://golwg.360.cymru/ased/sites/2/2024/04/Parry-Aelwyd-hoff-lun-Nia-gan-640x396.jpg)
O fod wedi gweithio fel cyflwynydd ar y gyfres Adre [ar S4C] am flynyddoedd, mi dw i wedi cael y profiad hyfryd a’r fraint o ymweld â degau o gartrefi enwogion Cymru. Heb os, y tai mwya’ diddorol a chroesawgar ydy’r rheiny lle mae stamp cymeriad y perchennog yn amlwg arnyn nhw. Dw i’n credu’n gryf bod cartre’ go iawn yn estyniad o’ch personoliaeth. I fi, y stamp personol yma sy’n gwneud tŷ yn gartref.
![](https://golwg.360.cymru/ased/sites/2/2024/04/Parry-Aelwyd-Mae-Nia-wrth-640x480.jpg)
Hefyd, mae’n beth rhyfedd i ddweud ella’ – ond mae cariad yn creu cartref. Dw i’n sicr bod cariad yn y waliau mewn cartre’ clyd a chynnes. Cariad a phobl. Y bobl sy’n byw neu’n cyd-fyw mewn gofod sy’n creu cartre’ go iawn yn fy marn i a does dim ots os ydach chi’n byw mewn fflat un stafell neu blasty crand – os ydy’r darn bach yna o dir yn eich gwneud chi’n hapus, dyna ydy cartre’.
![](https://golwg.360.cymru/ased/sites/2/2024/04/Parry-Aelwyd-lluniau-cyntedd-640x480.jpg)
Mae Nia Parry wedi dod yn llais cyfarwydd ar Radio Cymru gan gyflwyno ambell raglen yn lle Aled Hughes ar ei raglen foreol a Ffion Emyr ar nosweithiau Sadwrn. Mae Nia newydd orffen cynhyrchu Priodas Pum Mil a Prosiect Pum Mil fydd i’w gweld ar S4C yn fuan.