Mae Llywodraeth Cymru’n atgoffa rhieni am y grant Hanfodion Ysgol, sy’n gallu eu helpu gyda chostau gwisg ysgol, esgidiau, bagiau, dillad chwaraeon ac offer, a mwy.
Yn ôl y Llywodraeth, mae 88% o’r rhai sy’n gymwys ar gyfer y grant eisoes wedi ei hawlio.
Gall plant teuluoedd ar incwm is sy’n derbyn budd-daliadau penodol, y rhai sy’n ceisio lloches, a phlant mewn gofal hawlio £125 y flwyddyn i helpu gyda chostau ysgol.
Oherwydd y gost ychwanegol y gallai teuluoedd ei hwynebu pan fydd eu plant yn dechrau yn yr ysgol uwchradd, mae £200 ar gael i ddisgyblion sy’n mynd i mewn i Flwyddyn 7.
Gallai hefyd olygu cyllid ychwanegol i’r ysgol.
Gwneud cais
Dydy hi ddim yn rhy hwyr i wirio cymhwystra a gwneud cais am gyllid ar gyfer eleni, yn ôl y Llywodraeth.
Daw’r cyfnod ymgeisio i ben ar Fai 31.
Mae modd gwneud cais bob blwyddyn ar gyfer pob plentyn.
Mae disgyblion o bob math o leoliadau addysg yn gymwys, cyn belled â’u bod rhwng pump ac 16 oed.
Mae hyn yn berthnasol i ddisgyblion ym mhob ysgol a lleoliad, gan gynnwys ysgolion arbennig ac unedau cyfeirio disgyblion.
Sut mae’r arian yn helpu ysgolion?
“Rydych chi am i bob plentyn gael ei drin yr un fath, ac rydych chi am i bob plentyn gael yr un profiadau,” meddai Steffan Jones, Pennaeth Ysgol Gymunedol Trimsaran yn Sir Gaerfyrddin.
“Mae’r grantiau hyn yn helpu, fel y gall pob plentyn gymryd rhan a mwynhau ei amser yn yr ysgol, nid dim ond y rhai sy’n gallu fforddio hynny.”
Mae modd defnyddio’r grant i dalu am:
- wisg ysgol, gan gynnwys cotiau ac esgidiau
- gweithgareddau ysgol, fel dysgu offeryn cerddorol, dillad chwaraeon ac offer ar gyfer gweithgareddau ar ôl ysgol
- hanfodion ar gyfer yr ystafell ddosbarth, fel pennau ysgrifennu, pensiliau a bagiau
Hyd yn oed os yw plentyn eisoes yn derbyn Prydau Ysgol am Ddim, mae dal angen gwirio cymhwyster i gael y Grant Hanfodion Ysgol a chyllid ychwanegol ar gyfer yr ysgol.
Ewch i wefan Llywodraeth Cymru i wirio a ydych chi’n gymwys ar gyfer y grant.
