Ar Ddydd Gŵyl Dewi, mae Mark Drakeford wedi annog y genedl “i wneud y pethau bychain”.
Yn ei neges olaf ar ŵyl ein nawddsant cyn rhoi’r gorau i fod yn Brif Weinidog, mae e’n sylw at yr hyn sydd gan Gymru i’w gynnig i’r byd.
Dywed hefyd fod lle i bawb fod yn fwy caredig i’w gilydd.
“Heddiw, ar Ddydd Gŵyl Dewi, bydd pobl ym mhob cwr o Gymru a dros y byd i gyd yn dathlu Cymru a Chymreictod,” meddai.
“Ar ein diwrnod cenedlaethol, rydyn ni am wneud y pethau bychain, fel Dewi Sant ei hunan, i helpu i wella bywydau pobl eraill.
“Gwlad y gân yw Cymru, ond mae gofalu am bobl eraill a bod yn gymwynasgar yn rhan yr un mor greiddiol o bwy ydyn ni fel Cymry.
“Ac yn y cyfnod ansicr hwn, gallwn ni i gyd fod ychydig yn fwy caredig, a gwneud y pethau bychain.
“Rydyn ni’n falch o’n gwerthoedd. Mae Cymru’n wlad agored a goddefgar.
“Mae gennym ni gymunedau agos, sydd wedi’u hadeiladu ar seiliau cadarn o barchu cyfiawnder a thegwch cymdeithasol.”
Heddiw rydyn ni'n dathlu popeth sy'n ein gwneud ni'n falch o fod yn Gymry.
Lle bynnag ydych chi yn y byd, dymunaf ichi Ddydd Gŵyl Dewi Hapus 🏴 pic.twitter.com/6DHwjQMz43
— Mark Drakeford (@PrifWeinidog) March 1, 2024
Arloesedd
Mae’r Prif Weinidog yn mynd yn ei flaen i ganmol arloesedd y Cymry, a’n gallu i feithrin syniadau.
“Ond mae Cymru hefyd yn gartref i fusnesau byd-eang,” meddai.
“Yma, rydyn ni’n meithrin syniadau, ac yn annog pobl i greu a thorri tir newydd.
“Diolch i’r Gymraeg, a’n hanes a’n diwylliant cyfoethog, heb sôn am ein mynyddoedd mawreddog, ein harfordir trawiadol a’n dinasoedd bywiog, mae gan Gymru rywbeth unigryw i’w gynnig i weddill y byd.
“Ar Ddydd Gŵyl Dewi, felly, gadewch inni sefyll yn hyderus ar y llwyfan rhyngwladol a dangos ein gwlad ar ei gorau.
“Dyma fy neges Gŵyl Dewi olaf fel eich Prif Weinidog.”
‘Croesawu pawb’
Ychwanega fod Cymru’n wlad sy’n croesawu pawb.
“Ond byddwn ni’n dal ati i weithio dros Gymru gryfach, decach a gwyrddach, gan adael neb ar ôl,” meddai.
“Mae Cymru’n wlad sy’n rhoi croeso i bawb.
“Mae Cymru’n wlad lle y gall ein plant lwyddo a chyrraedd y nod, heb orfod meddwl am ymadael â hi.
“Ble bynnag rydych chi’n dathlu Dydd Gŵyl Dewi eleni, gwnewch rywbeth bychan i godi calon rhywun arall.
“Ac felly, am y tro olaf fel y Prif Weinidog, ga’ i ddymuno Dydd Gŵyl Dewi hapus ichi i gyd.”
