Mae Heddlu’r De wedi annog ffermwyr i beidio dod â thractorau a cherbydau amaethyddol i brotest ym Mae Caerdydd yfory (dydd Mercher, Chwefror 28).
Mae disgwyl torf fawr y tu allan i’r Senedd am 12.30yp, wrth i ffermwyr brotestio yn erbyn y Cynllun Ffermio Cynaliadwy.
Dywed Heddlu’r De y byddan nhw’n monitro’r sefyllfa yn ofalus ac nad ydyn nhw’n siŵr ar hyn o bryd faint o oedi fydd i deithwyr ar y ffyrdd.
Does dim bwriad i gau unrhyw ffyrdd, ond fe fydd mynediad at rai ffyrdd ger y Senedd yn cael eu rheoli, meddai’r heddlu.
‘Risg i ddiogelwch’
“Mae Heddlu De Cymru’n parchu’r hawl i brotestio’n heddychlon ac rydym mewn trafodaethau gyda’r trefnwyr i sicrhau bod y brotest yn digwydd yn ddiogel, yn gyfreithlon gyda chyn lleied o darfu â phosibl ar y cyhoedd,” meddai’r Uwch-Arolygydd Esyr Jones.
“Tra bod cytundeb i hwyluso gweithgarwch protestio y tu allan i’r Senedd, byddwn yn annog protestwyr i beidio â dod â thractorau na cherbydau amaethyddol eraill i’r brotest.
“Mae yna bryderon eu bod yn peri risg i ddiogelwch defnyddwyr eraill y ffyrdd ac yn cyfyngu ar symudiad y gwasanaethau brys mewn amgylchedd dinas brysur.
“Byddwn yn monitro’r sefyllfa drwy gydol y dydd a dylai modurwyr wirio am unrhyw darfu ar y rhwydwaith ffyrdd a chynllunio eu teithiau yn unol â hynny.
“Byddwn yn hysbysu’r cyhoedd am unrhyw oedi neu aflonyddwch yn ystod y dydd.”
Mae’r digwyddiad ddydd Mercher yn rhan o brotestiadau ehangach sydd wedi cael eu cynnal ar draws Cymru, wrth i amaethwyr ddangos eu gwrthwynebiad i’r Cynllun Ffermio Cynaliadwy.
Mae undebau amaethyddol yn dadlau bod gofynion y Cynllun yn peryglu busnesau.
Mae’r gofynion yn cynnwys sicrhau bod coed yn cael eu plannu ar 10% o dir fferm, a bod 10% yn cael ei reoli fel cynefin.
