Dyn wedi marw ar ôl gwrthdrawiad ar yr M4 ger Casnewydd

Mae dyn 52 oed wedi marw ar ôl gwrthdrawiad ar yr M4, ac mae dyn arall wedi’i arestio ar amheuaeth o achosi marwolaeth drwy yrru’n beryglus.

Arhosodd rhan o’r draffordd ar gau yn ystod y brif awr frys fore heddiw (dydd Mawrth, Ionawr 30) wrth i ymchwiliad yr heddlu barhau.

Dywed Heddlu Gwent eu bod nhw wedi derbyn adroddiadau o wrthdrawiad ger Casnewydd tua 9 o’r gloch nos Lun (Ionawr 29).

Cafodd swyddogion eu hanfon i’r safle, ac maen nhw’n dweud bod tri char – BMW X4, Vauxhall Agila a Volkswagen Polo – wedi bod yn rhan o’r digwyddiad ar y ffordd tua’r dwyrain rhwng cyffordd 28 a 29.

Roedd gyrrwr y Vauxhall – dyn 52 oed o Gasnewydd – wedi marw yn y fan a’r lle, ac mae ei deulu wedi cael gwybod ac yn derbyn cefnogaeth gan swyddogion arbenigol.

Mae dyn 34 oed o Gaerdydd wedi’i arestio ar amheuaeth o achosi marwolaeth drwy yrru’n beryglus ac mae’n cael ei gadw yn y ddalfa wrth i ymholiadau barhau.

Mae swyddogion bellach wedi ailagor yr M4 rhwng cyffyrdd 29 a 28.