Mae Jeremy Miles, Gweinidog Addysg a’r Gymraeg yn Llywodraeth Cymru, wedi addo “rhoi terfyn ar gylch o argyfyngau Torïaidd sydd wedi blino cynifer o bobol”.
Daw’r neges mewn fideo newydd, wrth iddo fe frwydro yn erbyn Vaughan Gething i olynu Mark Drakeford, Prif Weinidog Cymru ac arweinydd Llafur Cymru.
Bydd canghennau lleol y Blaid Lafur yn dechrau cynnal cyfarfodydd enwebu y penwythnos hwn, ac mae neges Jeremy Miles yn diolch i aelodau am eu cefnogaeth – gan gynnwys mwyafrif clir o Aelodau’r Senedd, ac arweinwyr a dirprwy arweinwyr cynghorau.
Wrth lansio’i ymgyrch yr wythnos hon, fe ddatgelodd e chwe addewid ynghylch:
- gwariant addysg
- torri rhestrau aros
- tai cydweithredol newydd
- swyddi gwyrdd
- costau bws tecach
- ymrwymiad i ddatganoli rhagor o bwerau i gymunedau
Pan oeddwn yn tyfu i fyny, allwn i byth dychmygu y byddwn i un diwrnod yn rhoi fy hun ymlaen i arwain ein plaid a’n cenedl.
Dyma pam rwy'n sefyll i fod yn arweinydd nesaf Llafur Cymru a Phrif Weinidog Cymru.https://t.co/MV5ZnX5FTP pic.twitter.com/tVcr5Sa4rF
— Jeremy Miles (@Jeremy_Miles) January 12, 2024