Aelod Seneddol yn dweud ei bod yn “bryderus iawn” am ddiflaniad pedwar llanc

Mae Liz Saville Roberts yn dweud ei bod yn “bryderus iawn” am ddiflaniad pedwar llanc fu’n gwersylla yn Eryri dros y penwythnos.

Does neb wedi gweld Jevon Hirst, Harvey Owen, Wilf Fitchett na Hugo Morris o Amwythig ers dydd Sul (Tachwedd 19).

Mae lle i gredu eu bod nhw wedi teithio o ardaloedd Harlech a Phorthmadog mewn car Ford Fiesta lliw arian.

Mae Heddlu’r Gogledd yn annog unrhyw un sydd wedi eu gweld nhw i gysylltu â nhw, ac maen nhw wedi cadarnhau eu bod nhw bellach wedi dod o hyd i’r car roedden nhw’n teithio ynddo.

“Mae diflaniad y pedwar hyn yn eu harddegau ar drip gwersylla yn #Eryri yn bryderus iawn,” meddai Aelod Seneddol Dwyfor Meirionnydd.

“Mae fy meddyliau ar unwaith â’u teulu a’u ffrindiau fydd yn eithriadol o bryderus am eu lles.

“Dw i’n deall fod Heddlu’r Gogledd, timau achub mynydd lleol ac aelodau eraill o’r gwasanaethau brys yn parhau â’u hymdrechion i chwilio amdanyn nhw fore heddiw.

“Dw i a fy swyddfa’n cael ein diweddaru ynghylch unrhyw ddatblygiadau.

“Dw i’n annog unrhyw un ag unrhyw wybodaeth i gysylltu â Heddlu’r Gogledd, gan ddyfynnu’r rhif cyfeirnod: A184194.”