Rhaglen gofal plant yn rhagori ar dargedau – AoS Arfon ‘ar ben ei digon’

Mae rhaglen Dechrau’n Deg Llywodraeth Cymru, sy’n cael ei hymestyn fel rhan o Gytundeb Cydweithio’r Llywodraeth â Phlaid Cymru, wedi rhagori ar ei thargedau.

Yn unol â’r Cytundeb Cydweithio â Phlaid Cymru, mae’r Llywodraeth yn ehangu’r ddarpariaeth blynyddoedd cynnar fesul cam i gynnwys pob plentyn dwy oed, gyda phwyslais arbennig ar gryfhau’r ddarpariaeth cyfrwng Cymraeg.

Dywed Julie Morgan Aelod Seneddol, y Dirprwy Weinidog dros Wasanaethau Cymdeithasol, fod y llwyddiant yn dyst i waith caled awdurdodau lleol, y Gwasanaeth Iechyd Gwladol a’r sector gofal plant.

“Dros y ddwy flynedd nesaf bydd rhaglen Dechrau’n Deg yn cefnogi mwy na 9,500 o blant dwy oed ychwanegol diolch i fuddsoddiad pellach o £46m,” meddai Siân Gwenlliant, Aelod Plaid Cymru dros Arfon ac Aelod Dynodedig yn y Cytundeb Cydweithio.

“Mae hyn yn ychwanegol at y Cynnig Gofal Plant, sy’n darparu 30 awr o ofal plant wedi’i ariannu am 48 wythnos y flwyddyn i rieni sy’n gweithio a’r rhai mewn addysg a hyfforddiant gyda phlant tair a phedair oed.

“Gall buddsoddiad yn y blynyddoedd cynnar fod yn drawsnewidiol i addysg plant.

Mae’n wych gweld y cynnydd sy’n cael ei wneud ar yr ymrwymiad yn y Cytundeb Cydweithio i gynnig gofal plant am ddim i bob plentyn dwy oed.”