Prif Gyfansoddwr Eisteddfod yr Urdd 2022 yw’r ieuengaf erioed yn hanes yr Ŵyl

Shuchen Xie, sy’n 12 oed ac yn byw yng Nghaerdydd, yw Prif Gyfansoddwr Eisteddfod yr Urdd Sir Ddinbych 2022 – a’r ieuengaf erioed i gipio Prif Wobr yn hanes yr Ŵyl.

Ar ddiwrnod agoriadol Eisteddfod yr Urdd Sir Ddinbych 2022, cafodd y tri phrif enillydd eu gwahodd i’r llwyfan ar gyfer y seremoni, er mwyn datgelu pwy oedd yn gyntaf, ail a thrydydd o flaen cynulleidfa fyw.

Mae’r datblygiad yma yn nhrefn y prif seremonïau wedi’i ysbrydoli gan lwyddiant Gŵyl ddigidol Eisteddfod T dros y ddwy flynedd diwethaf, ac mi fydd y drefn yn parhau ar gyfer holl brif seremonïau’r wythnos.

Mae Shuchen yn ennill teitl y Prif Gyfansoddwr am gyfansoddi darn ar gyfer pedwarawd llinynnol gyda’r teitl Rhapsody in G minor.

Roedd y beirniad Mared Emlyn wedi ei chalonogi’n fawr gyda safon y gystadleuaeth, gyda’r ensemble a gyflwynodd Shuchen o dan y ffugenw ‘Endurance’ yn “bleser i’w weld a’i glywed.”

Yr enillydd

Yn ddisgybl yng ngholeg St. John’s, Caerdydd mae Shuchen yn gerddor angerddol sy’n chwarae’r piano, sacsoffon a sielo.

Ers tair blynedd mae hi’n sy’n dilyn cwrs cyfansoddi Conservatoire Iau yng Ngholeg brenhinol Cerdd a Drama Cymru. Mae cyfansoddi yn apelio’n fawr iddi a chyrhaeddodd rownd derfynol Cyfansoddwr Ifanc NCEM & BBC Radio 3 yn 2021 (sy’n gystadleuaeth ar gyfer rhai hyd at 18 oed) yn ogystal ag ennill sawl gwobr dros y blynyddoedd yng Ngŵyl Cerddorion Ifanc Abertawe.

Mae Shuchen yn wyneb cyfarwydd i’r Urdd ac wedi perfformio lawer gwaith ar lwyfan y genedlaethol – bu iddi ennill cystadleuaeth cyfansoddi iau (Cynradd) Eisteddfod T 2021, ynghyd â’r unawd piano.

Yn y darn buddugol, mae hi’n archwilio gwahanol emosiynau trwy amrywio’r tempo ac yn defnyddio rhythmau’r Tango a’r Scherzo.

Y feirniadaeth

“Dwi wedi fy nghalonogi’n fawr gyda safon y gystadleuaeth eleni, ac roedd hi’n anodd iawn gwahanu gyda’r safon mor uchel,” meddai Mari Emlyn yn ei beirniadaeth.

“Ges i fy rhyfeddu gan allu’r cyfansoddwr buddugol i symud drwy gyweiriau, harmonïau ac amsernodau gwahanol mewn ffordd mor naturiol. Llongyfarchiadau mawr i bawb.”

Derbyniodd Shuchen y Fedal, sef Medal Goffa Grace Williams, wedi ei chreu gan y gemydd Rhiannon o Dregaron.

Cafodd y Fedal hon ei rhoi gan Gôr Rhuthun a chafodd y seremoni ei noddi gan Gyngor Sir Dinbych.

Yn ail yn y gystadleuaeth oedd Gwydion Powel Rhys, Cylch Bangor Ogwen a Kai Edward Fish o Gwm Rhymni oedd yn drydydd.

Mae modd dod o hyd i holl ganlyniadau’r Ŵyl drwy ymweld â’r wefan s4c.cymru/urdd