Côrdydd yw pencampwyr cystadleuaeth Côr Cymru 2022.
Cafodd rownd derfynol y gystadleuaeth ei chynnal yn fyw yng Nghanolfan y Celfyddydau yn Aberystwyth neithiwr (nos Sul, Ebrill 3).
Y côr o Gaerdydd, dan arweiniad Huw Foulkes, ddaeth i’r brig gan guro pedwar côr arall i ennill tlws Côr Cymru a gwobr ariannol o £4,000.
Morgan Jones a Heledd Cynwal fu’n cyflwyno’r noson, ac CF1, Côr Ieuenctid Môn, Johns’ Boys a Chôr Heol y March oedd y pedwar côr arall a enillodd eu categorïau i gyrraedd y rownd derfynol.
Dyma’r degfed tro i’r gystadleuaeth gael ei chynnal ers iddi gael ei sefydlu yn 2003, a chafwyd perfformiad arbennig gan ferch fach saith oed o Wcráin hefyd.
“Llongyfarchiadau mawr i Côrdydd am ennill cystadleuaeth Côr Cymru 2022,” meddai Sian Doyle, Prif Weithredwr S4C ar Twitter.
“Pum côr ardderchog – am gystadleuaeth.
“Braint oedd cael cwmni Amelia Anisovych, merch saith oed o Wcráin, yn Aberystwyth heno hefyd.”
‘Breuddwyd cael perfformio’
Cafodd fideo o Amelia Anisovych yn canu ‘Let It Go’ o’r ffilm Frozen mewn lloches danddaearol yn Kyiv ei rhannu ar y cyfryngau cymdeithasol, a theithiodd i Aberystwyth er mwyn canu yng nghystadleuaeth Côr Cymru.
“Dwi wrth fy modd yn canu, a dwi’n ymarfer bob bore, pnawn a nos!” meddai Amelia Anisovych.
“Mae bob amser wedi bod yn freuddwyd i fi gael perfformio.”
Amelia Anisovych, 7 oed o Wcráin, yn canu anthem genedlaethol y wlad yn ystod ffeinal Côr Cymru heno. ??
Amelia Anisovych, 7 years old, from Ukraine singing Ukraine's National Anthem during tonight's Côr Cymru final. ?? pic.twitter.com/OWxZUaOg4A
— S4C ??????? (@S4C) April 3, 2022
‘Uno perfformwyr’
Dywed Elen Rhys, Comisiynydd Adloniant S4C ei bod hi’n “fraint arbennig” cael croesawu Amelia i Gymru ac i ganu yn Aberystwyth.
“Mae wedi bod yn benwythnos o gerddoriaeth bwerus ar S4C gyda Chyngerdd Cymru ac Wcrain a ffeinal Côr Cymru ac rydyn ni’n falch o gael uno perfformwyr Cymru ac Wcrain gan ymfalchïo yn nhalent Amelia,” meddai.
