Mae dynes wedi cael ei harestio wedi i ddau o bobol gael eu hanafu’n ddifrifol yn dilyn gwrthdrawiad rhwng nifer o geir yng Nghwm Rhondda.
Tarodd car yn erbyn chwech o geir oedd wedi’u parcio ar ymyl y ffordd yn Nhrealaw fore Sul.
Cafodd dynes arall oedd yn teithio yn y car ei hanafu’n ddifrifol.
Mae dau ddyn oedd yn teithio mewn car arall hefyd wedi cael eu harestio.
Cafodd y gwasanaethau brys eu galw am 7.45yb, a bu’n rhaid torri un person yn rhydd o gar ar Ffordd Ynyscynon.
Roedd un car wedi moelyd.
Cafodd y ddau sydd mewn cyflwr difrifol eu cludo i Ysbyty Brenhinol Morgannwg yn Llantrisant.
Mae’r heddlu’n apelio am dystion.
