AoS Llafur yn galw’r drafodaeth am annibyniaeth yn “iachus”

Mae’r drafodaeth gyhoeddus ynghylch annibyniaeth i Gymru yn “arwydd o aeddfedrwydd” gwleidyddol, yn ôl Aelod Llafur o’r Senedd.

Daw sylwadau John Griffiths, AoS Dwyrain Casnewydd, yn ystod cyfweliad â gwefan LabourList ar drothwy etholiad mis Mai.

Mae wedi cynrychioli ei sedd yn ddi-dor ers 1999, pan gafodd etholiad cyntaf y Senedd ei gynnal, ac fe dywedodd wrth y wefan ei fod yn hapus bod annibyniaeth bellach yn destun trafodaeth gyhoeddus.

“Dw i’n credu bod cynnal y ddadl, a’r drafodaeth, am annibyniaeth yn beth iachus,” meddai.

“Mae’r term indy-curious yn cael ei ddefnyddio, a dyw hynny ddim yn beth gwael.

“Mae chwilfrydedd, yn gyffredinol, yn beth da.

“A dylai pobol gymryd diddordeb, a dylen nhw fod eisiau bod yn wybodus am y mater.

“Dw i’n credu ei fod yn beth da ein bod yn cynnal y ddadl yma, ac mae’n arwydd o aeddfedrwydd gwleidyddol pellach, dw i’n credu.”

Llafur ac annibyniaeth

Polisi Llafur Cymru yw fod Cymru yn elwa o fod yn aelod o’r Deyrnas Unedig, a bod angen diwygio’r undeb – nid ei chwalu.

Ond mae arwyddion cynyddol bod yna newid agwedd ar droed oddi mewn i Lafur Cymru.

Mae tri o ymgeiswyr y blaid yn etholiadau’r Senedd eleni yn agored o blaid annibyniaeth i Gymru, ac mae lle i gredu bod y rhan fwyaf o aelodau’r blaid hefyd o’r un farn.

Fe wnaeth arolwg barn YouGov ym mis Medi awgrymu bod y rhan fwyaf o’r rheiny a bleidleisiodd o blaid Llafur yn etholiad cyffredinol 2019 yn pleidleisio o blaid annibyniaeth (51% o blaid, 49% yn erbyn).

Ymgeiswyr Dwyrain Casnewydd