Mae enillwyr Gwobrau Dewi Sant wedi cael eu datgelu yn ystod seremoni rithwir.
Dyma’r wythfed tro i’r gwobrau gael eu cynnal, ac maent yn gyfle i gydnabod cyflawniadau eithriadol pobol yng Nghymru, a phobol sy’n dod o Gymru.
Yn ogystal, mae’r seremoni yn gyfle i gydnabod gweithredoedd a chyfraniadau pobol o bob cefndir yn ystod y flwyddyn.
Cyhoeddodd Mark Drakeford fod yr Athro Keshav Singhal yn derbyn Gwobr Arbennig y Prif Weinidog.
Yr Athro Singhal yw Cadeirydd grŵp Asesu Risg Covid-19, grŵp a gafodd ei sefydlu ar ddechrau’r pandemig, a arweiniodd at ddatblygu adnodd Asesu Risg Covid-19 Cymru Gyfan.
“Grŵp ysbrydoledig o bobol”
“Mae teilyngwyr Gwobrau Dewi Sant eleni yn grŵp ysbrydoledig o bobol yr ydym yn lwcus i’w cael yn byw ac yn gweithio yng Nghymru,” meddai Mark Drakeford yn ystod y seremoni rithwir.
“Mae’r flwyddyn ddiwethaf wedi bod yn hynod heriol. Mae pandemig y coronafeirws wedi achosi llawer o dristwch a thorcalon – ond mae hefyd wedi ysgogi’r gorau ymhlith llawer o bobl. Dim ond cyfran fach o’r rhai sydd wedi mynd y tu hwnt i’r galw yw’r enillwyr heno, ac maent yn ysbrydoliaeth wirioneddol i bob un ohonom.”
Enillwyr Gwobrau Dewi Sant eleni yw:
Dewrder – John Rees, Lisa Way, ac Ayette Bounouri
Busnes – Little Inspirations
Ysbryd y Gymuned – Deial i Deithio Sir Ddinbych
Gweithiwr Hanfodol – Cartref Gofal Cherry Tree
Diwylliant a Chwaraeon – Delwyn Derrick
Gwobr Ddyngarol – John Puzey
Arloesedd, Gwyddoniaeth a Thechnoleg – Y Fenter Ymchwil Busnesau Bach / Ymddiriedolaeth Gwasanaethau Ambiwlans Cymru
Person Ifanc – Molly Fenton, Ymgyrch Love Your Period
Gwobr Arbennig y Prif Weinidog – Yr Athro Keshav Singhal MBE
