Mae’r heddlu wedi rhybuddio’r cyhoedd i fod yn wyliadwrus o sgamiau sydd yn cynnig brechlynnau Covid-19 ffug.
Yn ôl Heddlu’r De maen nhw wedi dod ar draws sawl enghraifft o dwyllo, ac yn pwysleisio y bydd y brechlyn Covid-19 yn cael ei gynnig am ddim bob amser.
Mae’r heddlu hefyd yn annog pobol i godi ymwybyddiaeth am y sgamiau hyn ymysg teulu a ffrindiau.
Bydd y Gwasanaeth Iechyd byth yn:
- Gofyn am daliadau, gan fod y brechlyn am ddim
- Gofyn am eich manylion banc
- Cyrraedd eich cartref yn ddirybudd i roi’r brechlyn
- Gofyn i chi brofi eich manylion adnabod drwy anfon copïau o’ch dogfennau personol (e.e. pasbort)
‘Dyfeisgar a diegwyddor’
“Mae’r troseddwyr hyn yn ddyfeisgar ac yn ddiegwyddor,” meddai’r Ditectif Arolygydd Nick Bellamy o Uned Troseddau Economaidd Heddlu’r De.
“Gallant ymddangos yn argyhoeddiadol iawn, ac maent yn dewis manteisio ar bandemig byd-eang i geisio llenwi eu pocedi eu hunain.
“Bydd brechlyn Covid bob amser yn cael ei gynnig gan y Gwasanaeth Iechyd am ddim ac ni fydd angen i chi ddarparu manylion banc na manylion ariannol, cyfrineiriau na rhifau PIN ar unrhyw adeg.
“Gall negeseuon neu alwadau ffôn ffug sy’n honni eu bod gan y Gwasanaeth Iechyd neu’r llywodraeth, ofyn i chi ddarparu gwybodaeth bersonol neu glicio ar ddolen, neu gynnig grant gan y llywodraeth yn ymwneud â Covid i chi. Unwaith eto, sgamiau yw’r rhain.”
Enghreifftiau o sgamiau brechlyn Covid:
- Gofyn i ddioddefwyr dalu ffi i gael brechlyn Covid ffug
- Negeseuon testun twyllodrus yn cael eu hanfon er mwyn ceisio annog pobol i rannu eu manylion
- Pobol yn galw heibio cartrefi yn ddirybudd er mwyn rhoi’r brechlyn iddynt am ffi
- Gofyn i bobol bwyso rhif ar eu bysellfwrdd neu anfon neges destun i gadarnhau eu bod am dderbyn y brechlyn – gallai hyn naill ai ychwanegu at gost bil ffôn y dioddefwr neu ddatgelu gwybodaeth bersonol
- Mae gwefannau ffug, sy’n ymddangos fel rhai go-iawn, yn gofyn am fanylion banc er mwyn cael y brechlyn
