Gohirio gwaith datgomisiynu Trawsfynydd yn sgil achosion o’r coronafeirws

Bydd gwaith datgomisiynu safle niwclear Trawsfynydd yn cael ei ohirio am bythefnos yn sgil achosion o’r coronafeirws ymysg staff.

Mae’r cwmni niwclear Magnox wedi cadarnhau fod yno “nifer fechan” o achosion positif – mae’n debyg mai oddeutu 10 o achosion sydd wedi eu cadarnhau.

Stopiodd Trawsfynydd weithredu ym 1993 ond mae dros 200 o staff yn dal i weithio ar ddatgomisiynu’r y safle.

Dywedodd llefarydd ar ran Magnox: “Rydym wrthi’n mynd ati i oedi nifer o weithgareddau gwaith ar safle Trawsfynydd am gyfnod o 14 diwrnod o ganlyniad i nifer fach o weithwyr yn profi’n bositif am y coronafeirws.

“Mae hyn er mwyn cyfyngu ar ledaeniad posibl o fewn yr amgylchedd gwaith a chefnogi’r gymuned leol.

“O ddydd Mercher, Tachwedd 11, byddwn yn lleihau ein gweithwyr ar y safle yn raddol.

“Bydd y safle’n cynnal gweithgareddau diogelwch a chydymffurfiaeth amgylcheddol ac yn gwneud gwaith cynnal a chadw rheolaidd er mwyn sicrhau bod y gwaith datgomisiynu ailddechrau’n gyflym.”