Gŵr o flaen y llys ar gyhuddiad o geisio llofruddio ei wraig

Llys y Goron y Wyddgrug
Mae dyn o Gaernarfon, sydd wedi’i gyhuddo o geisio llofruddio ei wraig wrth iddi fynd â’i phlant i’r ysgol, wedi ymddangos gerbron Llys y Goron y Wyddgrug y bore ‘ma.

Mae Sylvan Parry, 46, o Ffordd Cibyn, Caernarfon, wedi’i gyhuddo o geisio llofruddio Fiona Parry, sy’n 40 oed.

Cafwyd hyd iddi ar lôn yng Nghefn Cadnant, rhwng Ffordd Llanberis a Maesincla, gydag anafiadau difrifol i’w phen.

Roedd nifer o blant a oedd yn cerdded i’r ysgolion gerllaw, sef Ysgol Maesincla ac Ysgol Syr Hugh Owen, wedi gweld yr ymosodiad honedig a ddigwyddodd am tua 9yb, ddydd Iau 3 Medi.

Cafodd Fiona Parry ei chludo i Ysbyty Stoke-on-Trent ac mae’r fam i chwech o blant yn parhau i fod mewn coma.

Mae ei chyflwr yn parhau’n ddifrifol ond yn sefydlog.

Mae disgwyl i Sylvan Parry gyflwyno ple yn y gwrandawiad nesaf ar 11 Tachwedd.

Mae’n cael ei gadw yn y ddalfa.