Mae’r heddlu yn Llanelli yn dweud eu bod nhw’n “gynyddol bryderus” am ddyn 25 oed sydd heb ei weld ers nos Iau.
Daw Richard Thomas Chandler o Kettering yn Swydd Northampton ac mae’n gweithio ers tair wythnos ar gytundeb trwsio toeon yn Nhrostre, Llanelli.
Gwelodd ei gydweithwyr ef ddiwethaf tuag 11:00 o’r gloch nos Iau. Cafodd ei weld yn hwyrach am 11:54 yn cerdded ar Heol y Doc Newydd i gyfeiriad Machynys. Nid yw wedi ei weld ers hynny a dywed yr heddlu fod hyn yn groes i’w natur.
Mae Richard Chandler yn bum troedfedd wyth modfedd o daldra, gyda gwallt tywyll. Roedd yn gwisgo hwdi llwyd Adidas, gyda throwsus tracwisg llwyd ac iddyn nhw V coch ar y boced gefn. Roedd sgidie chwaraeon glas golau am ei draed.
Mae Heddlu Dyfed Powys yn gofyn i unrhyw un sydd â gwybodaeth bellach i gysylltu â nhw ar rif 101.
