Llun o'r frwydr o raglen a ddangoswyd ar S4C
Fe fydd CD yn cael ei lansio’r wythnos nesa’ i gofio un o ddigwyddiadau arwrol ardal yr Eisteddfod eleni.
Ac fe fydd cyfle i bobol ar faes y Brifwyl weld perfformiad a ddenodd gynulleidfaoedd mawr yn y cylch y llynedd.
Y CD Mewn Undeb Mae Nerth yw’r cofnod diweddara’ o frwydr trigolion Llangyndeyrn yng Nghwm Gwendraeth i atal eu tir rhag cael ei foddi gan am ddŵr gan Gorfforoaeth Abertawe hanner can mlynedd yn ôl.
Mae’n cynnwys caneuon o sioe o’r un enw oedd wedi ei pherfformio adeg dathliadau’r fuddugoliaeth.
Y Babell Lên
Fe fydd perfformiadau o’r sioe gan Gwmni Theatr Ieuenctid Menter Cwm Gwendraeth yn Theatr Ffwrnes Llanelli ac yn y Babell Lên yn ystod wythnos yr Eisteddfod.
Mae’r CD yn cael ei lansio nos Wener nesa’ yn Neuadd Llangyndeyrn ac mae’n cael ei gyhoeddi dan label Cyhoeddiadau Gwenda – label y gantores leol, Gwenda Owen.
Ei gŵr, Emlyn Dole, sy’n gyfrifol am gyfansoddi’r canueon a’r sioe, sy’n cymryd ei theitl o’r geiriau ar y garreg goffa yng nghanol pentre’ Llangyndeyrn.
‘Pwysig cofio’
Mae clawr y CD hefyd yn cynnwys lluniau o’r frwydr ac mae dau o’r rhai a fu’n cymryd rhan hefyd yn crynhoi eu hatgofion.
“Mae’n bwysig fod pobol yn y dyfodol yn cofio am y brwydro a’r fuddugoliaeth yn Llangyndeyrn,” meddai Gwenda Owen wrth golwg360. “Mae’n bwysig ein bod yn cofio buddugoliaethau – mewn undeb mae nerth.”
Mae’r CD ar werth am £10.
