Lloegr 29–18 Cymru
Mae gobeithion Cymru o gipio Pencampwriaeth y Chwe Gwlad am y trydydd tro yn olynol drosodd yn dilyn buddugoliaeth haeddianol i Loegr yn Twickenham brynhawn Sul.
Wnaeth Cymru ddim ymddangos yn debygol o sgorio cais trwy gydol y gêm mewn gwirionedd a bu rhaid iddynt ddibynnu ar gicio cywir Leigh Halfpenny i roi gwedd gymharol barchus ar y sgôr terfynol.
Roedd Lloegr ar y blaen wedi dim ond pum munud ar ôl i Gymru amddiffyn mewn ffordd na fyddai’n dderbyniol mewn gêm Rygbi’r Ddraig rhwng dau dîm ysgol gynradd. Dyfarnwyd cic gosb i Loegr yng nghysgod y pyst, Trodd Lydiate, Feletau, Hibbard ac eraill eu cefnau ac fe lonciodd Danny Care drosodd am gais. Chwerthinllyd.
Dangosodd Cymru fymryn fwy o awch wedi hynny a llwyddodd Halfpenny i’w cadw yn y gêm yn yr hanner awr cyntaf. Cyfnewidiodd cefnwr Cymru ddwy yr un gydag Owen Farrell cyn trosi trydedd i ddod â’r sgôr o fewn pedwar pwynt gyda dim ond ychydig funudau i fynd tan hanner amser.
Yna, daeth ail gais y Saeson, a chais da ydoedd hefyd. Mesurodd Billy Twelvetrees ei gic i’r gornel yn berffaith a chyrhaeddodd Luther Burrell y bêl cyn Halfpenny i dirio.
20-9 i Loegr felly ond roedd Cymru yn ôl yn y gêm cyn yr egwyl diolch i ddwy gic gosb gyflym gan Halfpenny, 20-15 ar hanner amser.
Digon diflas oedd yr ail hanner o’i gymharu â’r cyntaf mewn gwirionedd. Trosodd Halfpenny dri phwynt arall i gymru ond aeth Farrell â’r gêm o afael yr ymwelwyr gyda thair cic gosb i’r tîm cartref.
Bu bron i Burrell orffen symudiad gwirioneddol wych i Loegr gyda chais ond cafodd ei atal gan dacl dda Halfpenny.
Ond roedd Lloegr wedi gwneud hen ddigon yn yr hanner cyntaf a doedd gan Gymru ddim i’w gynnig wrth i’r gêm orffen braidd yn ddi fflach, 29-18.
Mae’r canlyniad yn rhoi Cymru allan o’r Bencampwriaeth am eleni. Mae Lloegr dal ynddi gydag Iwerddon a Ffrainc, ond y Gwyddelod sydd â’r fantais o ran gwahaniaeth pwyntiau cyn y penwythnos olaf.
.
Lloegr
Ceisiau: Danny Care 6’, Luther Burrell 34’
Trosiadau: Owen Farrell 6’, 34’
Ciciau Cosb: Owen Farrell 19’, 27’, 46’, 55’, 59’
.
Cymru
Ciciau Cosb: Leigh Halfpenny 9’, 13’, 31’, 38’, 40’, 57’
Cerdyn Melyn: Gethin Jenkins 53’
