Abertawe 3–0 Caerdydd
Abertawe aeth â hi yn y gêm ddarbi Gymreig yn Uwch Gynghrair Lloegr nos Sadwrn gyda buddugoliaeth gyfforddus a haeddianol ar y Liberty.
Rhoddodd Wayne Routledge y tîm cartref ar y blaen yn gynnar yn yr ail hanner cyn i goliau Nathan Dyer a Wilfred Bony sicrhau’r tri phwynt i’r Elyrch.
Hanner Cyntaf
Daeth dau gyfle gorau Abertawe yn yr hanner cyntaf i Routledge, un ym munud cyntaf yr hanner a’r llall yn yr olaf, ond anelodd yr asgellwr yn syth at David Marshall ar y ddau achlysur.
Ar wahân i hynny, yr ymwelwyr a gafodd gyfleoedd gorau’r 45 munud agoriadol ond peniodd Kenwyne Jones heibio’r postyn o groesiad Craig Bellamy a llwyddodd Michel Vorm i arbed cynnig Peter Wittingham o bellter.
Ail Hanner
Hanner cyntaf digon agos felly ond dim ond un tîm oedd ynddi wedi’r egwyl a rhoddodd Routledge yr Elyrch ar y blaen wedi dim ond dau funud yn dilyn gwaith creu Pablo Hernández.
Tarodd Bellamy y trawst i Gaerdydd wedi hynny ond roedd yr ymosodwr braidd yn ffodus i aros ar y cae ar ôl taro Jonathan de Guzman toc wedi’r awr.
Ond hyd yn oed gydag un ar ddeg ar y cae ni allodd Caerdydd atal Abertawe rhag ychwanegu dwy gôl arall yn y chwarter awr olaf. Peniodd Dyer i gef y rhwyd i ddechrau o groesiad Routledge cyn i Bony ail adrodd y gamp o gic rydd Pablo ychydig funudau’n ddiweddarach.
Buddugoliaeth gyfforddus i Abertawe yn y diwedd felly ac mae’r canlyniad yn eu codi i’r degfed safle yn y tabl. Mae Caerdydd ar y llaw arall yn aros un lle o waelod tabl yr Uwch Gynghrair.
.
Abertawe
Tîm: Vorm, Rangel, Davies, Britton, Chico, Williams, Dyer (Taylor 88′), De Guzmán (Cañas 69′), Bony, Emnes (Hernández 45′), Routledge
Goliau: Routledge 47’, Dyer 79’, Bony 85’
Cerdyn Melyn: Hernández 78’
.
Caerdydd
Tîm: Marshall, Fabio (McNaughton 69′), John, Medel, Caulker, Turner, Bellamy, Whittingham, Jones (Campbell 56′), Kim, Zaha (Mutch 77′)
Cerdyn Melyn: Mutch 86’
.
Torf: 20,402
