Mae’r heddlu yn ymchwilio i ddigwyddiad lle cafodd dyn ei anafu ym Mhontypridd heddiw.
Cafodd yr heddlu eu galw oddeutu 12:30 prynhawn dydd Mercher i ardal Stryd Taf yn y dre ger archfarchnad Tesco. Yn ol rhai adroddiadau cafodd y dyn ei drywanu.
Dywedodd llefarydd ar ran Heddlu De Cymru bod Heol Sardis wedi cael ei gau dros dro tra bod y dyn yn cael ei gludo mewn ambiwlans awyr i Ysbyty Athrofaol Cymru.
Ychwanegodd y llefarydd bod amgylchiadau’r digwyddiad dan ymchwiliad ond mae arwyddion cynnar yn awgrymu bod rhywun wedi ymosod arno.
Dyw hi ddim yn glir pa mor ddifrifol yw ei anafiadau ar hyn o bryd.
Mae’r heddlu’n apelio ar unrhyw un oedd yn yr ardal ar y pryd a allai fod wedi gweld unrhyw beth amheus i gysylltu â’r heddlu ar 101 neu gallant ffonio Taclo’r Taclau yn ddienw ar 0800 555 111.
