Cymru 40–6 Ariannin
Sgoriodd Cymru bedwar cais yn Stadiwm y Mileniwm brynhawn Sadwrn wrth guro’r Ariannin yn gyfforddus.
Croesodd Mike Phillips a George North yn yr hanner cyntaf cyn i Toby Falatau a Ken Owens ychwanegu dau gais arall wedi’r egwyl.
Hanner Cyntaf
Rhoddodd Leigh Halfpenny Gymru ar y blaen yn gynnar gyda chic gosb cyn i Phillips sgorio cais cyntaf y gêm. Rhedodd y mewnwr yr holl ffordd ar ôl rhyngipio’r bêl ar y llinell hanner yn dilyn mynydd o dacl gan Richard Hibbard ar Nicolas Sanchez.
Treuliodd Justin Tipuric ddeg munud yn y gell gosb wedi hynny ond daeth unig bwyntiau’r cyfnod hwnnw o droed Halfpenny wrth i’r cefnwr ymestyn mantais y Cymry i 13 pwynt.
Yna daeth ail gais y tîm cartref pan gyfunodd Phillips a North yn dda wrth gefn y lein mewn symudiad yn syth o’r cae ymarfer i greu cais i’r cawr o asgellwr. 20-0 i Gymru yn dilyn trosiad Halfpenny wedi llai na hanner awr.
Sgoriodd Sanchez bwyntiau cyntaf yr Archentwyr wedi hynny ond adferodd Halfpenny’r ugain pwynt o fantais gyda chic olaf yr hanner.
Ail Hanner
Dechreuodd Cymru’r ail gyfnod yn dda hefyd ac fe lwyddodd Halfpenny gyda chic gosb gynnar yn dilyn gwrthymosodiad da gan Scott Williams a North o’u llinell gais eu hunain.
Ciciodd Sanchez dri phwynt arall wedi hynny ond dim ond un tîm oedd ynddi yn y chwarter olaf wrth i Gymru sicrhau’r fuddugoliaeth gyda dau gais arall.
Tiriodd Falatau i ddechrau gyda chais gorau’r gêm. Gwnaeth yr wythwr yn dda iawn i gefnogi Liam Williams wedi iddo yntau guro’i ddyn ar yr asgell chwith, cyn sgorio cais haeddianol.
A chais i’r blaenwyr oedd yr olaf wrth i’r eilydd fachwr, Ken Owens, sgori’i gais cyntaf dros ei wlad yn dilyn sgarmes symudol bwerus.
Trosodd Halfpenny’r ddau gynnig a gorffennodd y ciciwr y gêm gydag ugain pwynt
Perfformiad da gan Gymru felly a buddugoliaeth gyntaf yng ngemau’r Hydref ers pedair blynedd!
.
Cymru
Ceisiau: Mike Phillips 9’, George North 24’, Toby Falatau 56’, Ken Owens 67’
Trosiadau: Leigh Halfpenny 10’, 24’, 57’, 68’
Ciciau Cosb: Leigh Halfpenny 6’, 18’, 40’, 44’
Cardiau Melyn: Justin Tipuric 12’, Samson Lee 80’
.
Ariannin
Ciciau Cosb: Nicolas Sanchez 29’, 51’
