Dirprwy Is-Ganghellor Prifysgol Bangor yn ymddiswyddo

Wyn Thomas
Mae Dirprwy Is-Ganghellor Prifysgol Bangor, Wyn Thomas wedi ymddiswyddo o’i waith.

Ond fe fydd e’n parhau i fod yn ddarlithydd yn yr Adran Gerddoriaeth.

Fe fu’n gyfrifol am y Gymraeg a’r gymuned ers tair blynedd.

Graddiodd o Brifysgol Bangor yn 1979, a bu’n ddarlithydd yn yr Adran Gerdd ers hynny.

Yn rhinwedd ei swydd fel Dirprwy Is-Ganghellor, fe fu’n gyfrifol am ddarpariaeth Gymraeg y Brifysgol, dwyieithrwydd ac astudiaethau cyfrwng Cymraeg.

Fe fu’n rhan allweddol o brosiect y ganolfan gelfyddydau, Pontio hefyd.

Bu’n bennaeth Dysgu ac Addysgu Coleg y Celfyddydau, Addysg a’r Dyniaethau rhwng 2007 a 2010.

Bu hefyd yn allweddol wrth sicrhau addysg cyfrwng Cymraeg ym maes cerddoriaeth fel rhan o’r Coleg Cymraeg Cenedlaethol.

‘Rhesymau personol’

Dywedodd llefarydd ar ran Prifysgol Bangor: “Yn dilyn cyfnod o bron i dair blynedd fel Dirprwy Is-Ganghellor gyda chyfrifoldeb am faterion yn ymwneud â’r Gymraeg a’r Gymuned, mae Wyn Thomas wedi penderfynu ildio’i gyfrifoldebau am resymau personol a dychwelyd i’r Ysgol Cerddoriaeth ym mis Hydref.

“Rydym yn hynod ddiolchgar iddo am ei gyfraniad sylweddol i’r Brifysgol a’r Coleg Cymraeg Cenedlaethol yn ystod ei gyfnod fel Dirprwy Is-Ganghellor.”