Hoff awdur Cymraeg – cyhoeddi rhestr fer

O Chwefror 25 ymlaen, bydd cyfle gan ddarllenwyr i bleidleisio tros eu hoff awdur o blith y rhestr fer

11 Chwefror 2013

Mae’r deg awdur sydd ar restr fer Hoff Awdur Cymraeg Cymru, wedi eu cyhoeddi.

O Chwefror 25 ymlaen, bydd modd i’r cyhoedd bleidleisio dros eu hoff awdur ar wefan Radio Cymru (www.bbc.co.uk/radiocymru), a bydd yr enw sy’n dod i’r brig yn cael ei gyhoeddi ar Fawrth 7, Diwrnod y Llyfr.

Y deg awdur sydd wedi eu gosod ar y rhestr fer ydi: Caradog Prichard, Islwyn Ffowc Elis, Angharad Price, Manon Steffan Ros, Dewi Prysor, Jon Gower, Kate Roberts, Caryl Lewis, Bethan Gwanas a William Owen Roberts.

Fe gafodd y rhestr ei llunio gan banel o arbenigwyr oedd yn cynnwys dau lyfrwerthwr, dau lyfrgellydd, cynrychiolwyr Llenyddiaeth Cymru, y Llyfrgell Genedlaethol, Merched y Wawr, Y Cymro, Golwg a Barn, yn ogystal â’r adolygydd, Catrin Beard.

Poblogaidd

Swyddi

Trydan Gwyrdd Cymru

Arweinydd Cysylltiadau Grid

Trydan Gwyrdd Cymru

Rheolwr Prosiect

Tinopolis

Ymchwilydd

YTC 4 Llan CLT

Hwylusydd Prosiect

City And Guilds

Asesydd Allanol – Iechyd a Gofal Cymdeithasol CC (Cymraeg yn Ddymunol)

Prifysgol Bangor

Is-ddatblygwr Meddalwedd

20 sylw

Ben 11 Chwefror 2013, 12:34

Siom nad yw Mihangel Morgan yno, un o awduron mwyaf amryddawn a thoreithiog y Gymraeg

Guto Goch 11 Chwefror 2013, 13:35

Bob blwyddyn fe fydd rhywun neu’i gilydd yn anfon llythyr at Golwg a’r Cymro i ffieiddio at absenoldeb ei hoff gyfrol o’r rhestr fer – ymddengys mai’r bradwr Elystan sy’n mynd â bryd pawb eleni. Felly’r flwyddyn nesaf, beth am greu categori newydd, ‘Llyfr y Flwyddyn i’r Bôrs sy’n Sgwennu at Y Cymro’?

Tref Trwm 11 Chwefror 2013, 13:50

Robin Llywelyn? Dyma gamwedd.

Gareth 11 Chwefror 2013, 15:36

Nid Llyfr y Flwyddyn yw hwn Guto – darllen yn iawn.

Al 11 Chwefror 2013, 22:43

Cytuno gyda Ben. Mae Mihangel Morgan nid yn unig yn awdur toreithiog ond hefyd yn awdur amryddawn iawn sydd wedi llwyddo i greu gweithiau darllenadwy ond sydd hefyd a sylwedd dadansoddol yn perthyn iddyn nhw. Roedd Dan Gadarn Goncrit, Kate Roberts a’r Ystlum ynghyd Pantglas i gyd yn unigryw o ran cymeriadu, defnydd o ieithwedd a sylw craff o ran y natur ddynol a natur Cymreictod a Chymru. Efallai nad yw MM yn ddigon ‘ysgolheigaidd’ ei naws i rai beirniaid ond ei ddawn yw creu gweithiau amlhaenog sydd i’w gwerthfawrogi ar lefelau gwahanol. Pwy a ddewisodd y ‘rhestr fer’ yma? Oni bai am O Tynn y Gorchudd pa weithiau nodedig sydd gan AP (ac eithrio caersiant na lwyddodd i daro deuddeg yn gyffredinol)? caryl Lewis – ie – lle haeddiannol ar y rhestr gan ei bod wedi cyhoeddi nifer o weithiau sydd wedi llwyddo i sbarduno’r meddwl ynghyd a chyfrannu at weithiau mwy poblogaidd cyfres dramau’r drain a Stori Sydyn. Heb amheuaeth y mae Manon Ros hefyd yn ennill ei phlwy gyda ‘Blasu’ yn chwip o nofel wedi ei saernio’n gelfydd gyda chasgliad o gymeriadau o sylwedd. Tybed os oes angen troi nol at llenorion y gorffennol o hyd – KR IFfE a CP? Do lluniwyd campweithiau ganddynt ond onid amser yw hi i gloriannu cyfraniadau ein hawduron cyfoes?

Al 11 Chwefror 2013, 22:47

Gyda llaw – beth am Llwyd Owen sydd heb amheuaeth wedi gwthio’r nofel Gymraeg i dir newydd. A Lloyd Jones am ei nofel ‘Y daith’ ac ‘Y Dwr’? Awduron eu hoes sydd wedi cyfrannu at fywiocau llenyddiaeth Gymraeg o ran themau a dull adrodd.

Gareth 12 Chwefror 2013, 08:18

Ha ha ha! Ti’n swnio fel beirniad substandard mewn steddfod ysgol yn trio calonogi pob ymgeisydd won jac gydag ystrydebau! Mihangel Morgan ddim yn ddigon ysgolheigaidd?! Wot?! Wyt ti’n sicr dy fod cweit wedi deall yr “amlhaenau” rwyt ti’n sôn amdanynt?

Ond rwy yn cytuno na elli di gymharu’r awduron hyn sy dim ond ar ddechrau eu gyrfaoedd gyda’r lleill. Bydd pawb yn pleidleisio dros y clasuron. Felly beth yn union yw pwynt y gystadleuaeth? Cysgod y Cryman sydd wastad yn ennill categori hoff nofel y genedl. Felly hoff nofelydd y Gymru Gymraeg: IFfE. Cwestiwn nesaf?

Gareth 12 Chwefror 2013, 08:24

Duw a helpo beirniadaeth lenyddol yng Nghymru *pen yn fy nwylo*

Ron 12 Chwefror 2013, 09:09

Cytuno. Os bydd y gystadleuaeth yn cael ei gynnal yn deg gyda trawstoriad iawn o ddarllenwyr, bydd Caradog Prichard neu Islwyn Ffowc yn bendant yn ennill, a neb arall yn agos. Ond ofnaf bydd yn jôc o deitl fel gwobr Barn y Bobl lle mae pawb yn pleidleisio dros ei ffrindiau a rhai yn ddigon wynebgaled i ganfasio!

Evans 12 Chwefror 2013, 09:57

Cwrs Gwerthfawrogi Llenyddiaeth gan Al a Sioned Grug. Gwuuuych!

Al 12 Chwefror 2013, 11:54

darllen yn ofalus, Gareth

‘Efallai nad yw MM yn ddigon ‘ysgolheigaidd’ ei naws i rai beirniaid’

Gareth 12 Chwefror 2013, 12:55

Erioed wedi clywed y feirniadaeth honno rhaid cyfaddef, ond rhaid dy fod yn fwy darllengar na fi. Pa adolygydd sydd wedi cyhuddo’r ysgolhaig o beidio â bod yn ddigon ysgolheigaidd?

Ron 12 Chwefror 2013, 14:56

Camgymeriad yw pleidleisio ar wefan. Byddai’r gystadleuaeth llawer fwy teg (a synhwyrol) petai posib pleidleisio wrth brynu llyfr Cymraeg mewn siop neu ar wefan Gwales. Un pryniant = un bleidlais. Yn y ffordd yna, byddai unrhyw un fyddai’n cael teulu/ffrindiau/cymdogion i fwrw pleidlais drostynt o leiaf yn eu cael i brynu llyfr hefyd, gan i) gryfhau’r fasnach, ii) rhoi statws uwch na chwerthinllyd i’r gystadleuaeth ac yn iii) peri fod y teitl ei hun yn golygu rhywbeth. Fel arall, bydd y teulu/ffrindiau/cymdogion yn defnyddio pob cyfrifiadur a ffôn a allant i gefnogi eu perthynas/ffrind/cymydog a fydd neb ar eu hennill. Bydd yr holl beth yn jôc, fel Barn y Bobl.

Gareth 12 Chwefror 2013, 15:15

“Efallai”, Gareth, “efallai”. O ie, rwy’n gweld wedi darllen yn ofalus iawn.

8 o’r 10 ar y rhestr fer ddim yn ysgolheigion o unrhyw fath, ond Dr Mihangel Morgan PhD, y darlithydd mewn llenyddiaeth Gymraeg, “efallai” ddim yn ddigon ysgolheigaidd gan y beirniaid, a DYNA pam nad yw ar y rhestr.

Gair da yw “efallai” ynte?

Beth bynnag am y damcaniaethu athronyddol mawr, rhaid gofyn un cwestiwn pitw. Oes ’na ddim rhywun eitha amlwg ar goll o’r rhestr yma o nofelwyr mawr ein llên? Chi’n gwbod, hwnna mae cystadleuaeth y nofel yn yr Eisteddfod Genedlaethol wedi enwi ar ei ôl? Yr un wnaeth – daliwch eich gwynt – “dorri tir newydd” go iawn. Rwy bron yn siwr ei fod yn awdur toreithiog, sylwgar ar natur cymdeithas bla-di-bla hefyd. Ond, atolwg, fel MM, “efallai” fod problem am nad ysgrifennodd ar gyfer y doeth ar deallus. Biti, hynna.

Al 12 Chwefror 2013, 17:02

@ Gareth

Mae’n amlwg fod rhywbeth am y sylwadau wedi dy gorddi. Ta beth y pwynt sylfaenol yw y gallai MM wedi teilyngu ei le yn hawdd ar y rhestr (fel awduron eraill hefyd)
Diddorol fyddai nodi pa ‘feini prawf (sori am y jargon ystydebol eto, Gareth) a ddilynwyd wrth ddewis yr awduron sydd wedi cyrraedd y rhestr. A ystyriwyd gwerthiant, nifer testunau a gyhoeddwyd… neu ai barn a mympwy’r panel oedd sail y dewis.

Awen Schiavone 12 Chwefror 2013, 17:21

Beth yffach?! Am restr gwallgo! Bethan Gwanas – llond trol o gac ydi ei sdwff hi (yn fy marn i, wrth gwrs). A llawer o’r lleill heb neud digon i haeddu teitl ‘Hoff Awdur Cymru’ chwaith (yn fy marn i eto, wrth gwrs). Efallai mai dyma’r gwerthwyr gorau, ac mai dyna sail y rhestr?!
Lle mae Angharad Tomos, T Rowland Hughes, Lloyd Jones, Gwen Prichard Jones, T Llew Jones, Robin Llewelyn, Mihangel Morgan ayyb???

Gareth 12 Chwefror 2013, 17:59

T. Llew Jones – dyna bwynt. Yn fy marn innau, mae ’na rai ar y rhestr y byddwn wedi eu cwestiynu fwy na Bethan Gwanas.

Nid y gwerthwyr gorau, fyddwn i ddim yn meddwl. Roedd hyd yn oed awduron ‘go lew’ yn y ’40au a’r ’50au yn gwerthu rhai miloedd – ychydig iawn iawn all ddweud hynny heddiw.

50/50 dynion a merched, mi welaf. Ond mae Elena Puw Morgan yn haeddu ei lle fwy na rhai o’r rhai mwyaf diweddar yma. (Eto, yn fy marn i) Ac ie, Angharad Tomos.

Gareth 12 Chwefror 2013, 18:00

Corddi? Na. Chwerthin fydda i am ddiffyg ymwybyddiaeth, er bod rhywbeth hefyd yn drist ynddo.

Ron 12 Chwefror 2013, 18:21

Beth yw pwynt dal i faldorddi am y rhestr fer? Guto Goch uchod wedi rhagweld sut roedd pethau am fynd ac wrth gwrs roedd yn iawn. Mae’r rhestr fer yn bod, beth bynnag oedd y meini prawf. Y pwynt nawr yw i’r gystadleuaeth beidio mynd yn fwy o jôc nag st’n raid iddi fod. Gan y bydd y buddugwr (os yw’n gyfoes, ac fe fydd oherwydd ‘vested interest’ y sawl sy’n cynnal y gystadleuaeth, dim byd i wneud â safon cymharol y clasuron a’r hyn sy’n digwydd bod yn boblogaidd eleni) yn defnyddio’r teitl fel sail i gael rhagor o grantiau yn y dyfodol, a’r cyhoeddwr yn ei roi mewn blurb i werthu rhagor o gopiau, mae’n bwysig ei fod yn deg ac nid yn adlewyrchiad o bwy sydd a mwyaf o ffrindiau gyda mwyaf o access i wahanol gyfrifiaduron.

Os byddai’n gystadleuaeth deg, CP neu IFfE fyddai’n ennill hands down. Mae miloedd yn fwy wedi darllen ei gwaith yn un peth.

Al 13 Chwefror 2013, 14:20

Ron yn iawn – mae’r rhestr fer wedi ei phenderfynu a rhaid dewis o blith yr ymgeiswyr. Gobeithio y bydd ‘demograffig’ y bleidlais yn ehangach na dim ond gwrandawyr radio cymru a darllenwyr Golwg. Tybed a fyddai modd cynnwys croestoriad ehangach o bobl i fod yn rhan o’r bleidlais trwy ddanfon at fudiadau/sefydliadau penodol yn uniongyrchol e.e. Aelwydydd yr Urdd a Mudiadau Fferwmyr Ifanc; Ysgolion a Phrifysgolion; Mudiadau megis Merched y wawr / Clwb Gwawr; Clybiau chwaraeon; Clybiau Darllen i enwi ond carfan fach iawn. Gobeithio y bydd holl raglenni Radio Cymru (nid yn unig rhaglen Nia Roberts) yn dwyn sylw gwrandawyr o bob oedran at y bleidlais.

Mae’r sylwadau wedi cau.

Hoff awdur Cymraeg – cyhoeddi rhestr fer

O Chwefror 25 ymlaen, bydd cyfle gan ddarllenwyr i bleidleisio tros eu hoff awdur o blith y rhestr fer

Poblogaidd

← Stori flaenorol

Stori nesaf →

Hefyd →

20 sylw