Mae adroddiadau bod y seiclwr 23 oed o Wlad Belg, Michael Goolaerts mewn cyflwr difrifol yn yr ysbyty yn Ffrainc.
Y gred yw ei fod e wedi cael trawiad ar y galon ar ymyl y ffordd wrth gystadlu yn y ras 257km rhwng Paris a Roubaix – ras sy’n cael ei galw’n ‘Uffern y Gogledd’.
Cafodd e driniaeth ar ymyl y ffordd cyn cael ei drosglwyddo i’r ysbyty yn Lille.
Ar wefan gymdeithasol Twitter, dywedodd ei dîm nad oes rhagor o wybodaeth am ei gyflwr ar hyn o bryd, gan ofyn i bobol “beidio â dyfalu”.
No update on Michael Goolaerts yet. We kindly ask to refrain from speculation as we wait for an update on his situation. Our thoughts are with his family and friends now.
Thank you for the kind messages. pic.twitter.com/nSQPTZfPZf— Veranda’s Willems – Crelan Pro Cycling Team (@Snipercycling) April 8, 2018
Cafodd y ras ei hennill gan bencampwr y byd, Peter Sagan. Doedd e erioed wedi gorffen yn y pump uchaf o’r blaen.
Y Cymry
Daeth ras Geraint Thomas i ben yn y cymal cyntaf wrth iddo orfod gadael y ras ar ôl i nifer o feicwyr daro yn erbyn ei gilydd mewn peloton.
Doedd y Cymro arall yn y ras, Luke Rowe ddim ychwaith wedi gorffen y ras wrth geisio cadw i fyny gyda’r prif griw oedd yn cwrso tua’r blaen.
