Mae bwytai o Gymru wedi cael llwyddiant yng Ngwobrau Bwyd Stryd Prydain.
Cafodd y seremoni ei chynnal yn ystod digwyddiad yn Hull, Swydd Efrog, ac fe wnaeth llu o fasnachwyr bwyd stryd gasglu yno i gael eu beirniadu.
Fe aeth y brif wobr o’r noson, Y Gorau o’r Gorau, i Janet’s, sydd wedi eu lleoli ym Mhontypridd ac yn arbenigo mewn bwyd o ogledd Tsieina.
Roedd cegin Fire and Flank o Gaerdydd yn llwyddiannus yn y wobr am y Pryd Gorau, gyda’u stecen gig eidion nodweddiadol.
Fe gafodd Keralan Karavan, sydd eto o Gaerdydd, y wobr am y Frechdan Orau gyda thaco Indiaidd ei naws, a daethon nhw hefyd yn drydydd yn y wobr Dewis y Bobol.
Dywedodd trefnwyr yr ŵyl yn Hull bod hi’n wych cael noson ar ôl blwyddyn a hanner anodd i ddathlu bwyd o Brydain.
“Wrth eu boddau!”
Roedd David Evans o fwyty Fire and Flank yn llwyddiannus yn y categori Pryd Gorau, gyda stecen sy’n cael ei weini gyda hufen a sbigoglys.
“Oedd e’n ffantastig,” meddai wrth golwg360.
“Doeddwn i wir ddim yn disgwyl ennill dim byd.
“Ges i fynd yno fel wildcard, achos doeddwn i heb ennill yng Ngwobrau Bwyd Stryd Cymru.
“Ond achos y feedback ges i yno, fe wnaethon nhw ofyn i fi ddod i Hull ac roedd y beirniaid wrth eu boddau!
“Mae’r pryd nes i ennill gydag yn boblogaidd iawn – dw i’n cael llawer o negeseuon ar gyfryngau cymdeithasol yn gofyn am y rysáit, a phobol yn gofyn am fwy a mwy unwaith maen nhw’n ei drio!”
Busnes newydd
Fe wnaeth David Evans ddechrau Fire and Flank yn ystod y pandemig.
“Mae ond wedi bod yn mynd ers rhyw bedwar mis nawr,” meddai.
“Dw i yn rhedeg busnes bwyd stryd arall ers o gwmpas tair blynedd, felly mae gen i brofiad.
“Fe wnes i ddechrau yng nghanol Covid – doedd e ddim mor anodd a hynny, achos oeddwn i’n rhedeg busnes yn barod, felly oedd gen i’r dealltwriaeth o beth oedd angen ei wneud.”
Ar y map
Roedd David yn cytuno bod y gwobrau wedi rhoi diwydiant bwyd a choginio Cymru ar y map.
“Mae wedi gwneud hynny gant y cant,” meddai David.
“Rydyn ni wedi mynd yno i gystadlu yn erbyn bwyd o’r Alban ac ar hyd de a gogledd Lloegr, ac mae gwobrau’r Pryd Gorau, Brechdan Orau, a’r Gorau drwyddi draw i gyd wedi mynd i dde Cymru.
“Felly mae’n llwyddiant anhygoel i ni – mae Cymru wedi sgubo’r llawr!”
