Mae prynwyr tai yn parhau i dalu’n uwch na’r pris gofyn am eiddo yng Nghymru.
Mae hynny er bod y toriad ar dreth stamp wedi dod i ben ddechrau mis Gorffennaf.
Ar gyfartaledd, roedd tai yng Nghymru yn cael eu gwerthu am 100.4% o’r pris gofyn gwreiddiol, sef y ffigwr uchaf erioed yn ôl yr asiantaeth dai Hamptons.
Cyn 1 Gorffennaf, doedd dim rhaid talu treth stamp llawn ar eiddo o dan £500,000.
O’r dyddiad hwnnw, fe hanerodd y braced treth stamp o £500,000 i £250,000, ac o 1 Hydref, bydd yn dychwelyd i £125,000.
Distaw
Roedd arbenigwyr mewn eiddo yn adrodd bod toreth o brynwyr tai wedi trio cwblhau gwerthiannau cyn y dyddiad newid.
Mae Hamptons hefyd yn honni bod argaeledd isel mewn eiddo yn helpu i gadw prisiau’n uchel.
“Gorffennaf oedd y mis cyntaf ar ôl i’r toriad ar dreth stamp ddirwyn i ben,” meddai pennaeth ymchwil Hamptons, Aneisha Beveridge.
“Mewn amseroedd arferol, byddai’r wythnosau a’r misoedd yn dilyn toriad yn ddistaw iawn i’r farchnad, gyda llawer o brynwyr yn rhuthro i gwblhau cyn diwedd y toriad hwnnw.
“Ond y tro hwn, dydy hi ddim yn edrych fel bod y farchnad am gael ôl-effeithiau rhy niweidiol.”
Cystadleuol
Talodd 44% o brynwyr yn uwch na’r pris gofyn cychwynnol y mis diwethaf, gyda 30% yn gwario £1 miliwn neu fwy ar gartref newydd.
Yr amser cyfartalog i brynu cartref yng Nghymru ym mis Gorffennaf oedd 28 diwrnod, er bod llawer o brynwyr yn debygol o golli allan ar y toriad ar dreth stamp yn gyfan gwbl.
Ychwanegodd Hamptons bod brwydrau bidio yn parhau i fod yn gyffredin.
Roedd gan 40% o’r cartrefi a gafodd eu gwerthu yng Nghymru ym mis Gorffennaf gynigion gan dri neu fwy o brynwyr posib – 2% yn uwch na holl gartrefi’r Deyrnas Unedig am y mis hwnnw.
Dim ond 28% oedd gan dri neu fwy o gynigion ym mis Gorffennaf 2019, er bod hynny’n cwmpasu’r Deyrnas Unedig.
Dywedodd y cwmni mai’r Alban yw’r farchnad fwyaf cystadleuol o hyd, gyda bron i hanner (48%) y cartrefi a gafodd eu gwerthu yno’r mis diwethaf efo tri chynnig neu fwy.
