Wrth edrych ymlaen at wythnos caru cig oen yr wythnos nesaf (Medi 1-7) mae’r ffigurau diweddaraf yn dangos bod allforion cig oen y Deyrnas Unedig wedi cynyddu i lefelau tebyg i 2019.
Daw hyn yn dilyn gostyngiad yn yr allforion yn gynharach eleni o ganlyniad i’r coronafeirws.
Mae hyd at 40% o gig oen Cymru yn cael ei allforio yn flynyddol.
“Mae’r sector gwasanaeth bwyd yn gwsmer pwysig i Gig Oen Cymru mewn llawer o wledydd,” meddai Deanna Jones, Swyddog Gweithredol Datblygu Allforio Hybu Cig Cymru.
“Fe wnaethon ni ymateb [i’r pandemig] trwy ganolbwyntio mwy ar hysbysebu trwy’r cyfryngau cymdeithasol a’r sector manwerthu, er enghraifft drwy gynhyrchu fideos ryseitiau yn Ffrangeg a phartneriaeth marchnata gydag archfarchnadoedd yn yr Eidal.”
Fis Mehefin, gwelwyd ffigurau allforio uchel o gig oen i’r Eidal, Ffrainc, y Swistir, Canada, Hong Kong a’r Dwyrain Canol, yn ôl Hybu Cig Cymru.
“Mae’r ystadegau masnach ar gyfer yr Eidal yn arbennig o foddhaol,” meddai.
“Nid yn unig y gwelsom ffigurau cryf ar gyfer mis Mehefin ond erbyn hyn, mae mwy o gig oen wedi cael ei allforio yno yn ystod chwe mis cyntaf 2020 na’r un cyfnod yn 2019.”
Ffigurau
- 7,150 tunnell oedd allforion cig oen y Deyrnas Unedig ym mis Mehefin – 2.9% yn uwch na’r un mis y llynedd.
- 38,570 tunnell oedd cyfanswm allforion cig oen y Deyrnas Unedig yn ystod hanner cynta’r flwyddyn, 13.3% yn llai o gymharu â’r llynedd.
‘Angen ei warchod’
“Mae Cig Oen Cymru yn rhywbeth teuluol sydd angen cael ei warchod,” meddai Glyn Roberts, Llywydd Undeb Amaethwyr Cymru.
“Mae’n rhaid i ni amddiffyn ein ffermydd teuluol os ydym am barhau i fwynhau’r bwyd cynaliadwy, maethlon gwych yma.”
Yn ogystal ag effaith y coronafeirws pwysleisiodd fod trafodaethau masnach a Brexit yn her sydd yn parhau i wynebu’r sector.
“Mae ein ffermwyr yn gwneud llawer mwy na chynhyrchu bwyd cynaliadwy o’r safon gorau i ni – maent yn gofalu am ein hamgylchedd, yn creu gwerth yn yr economi wledig, yn cadw ein treftadaeth a’n diwylliant yn fyw a chymaint mwy,” meddai wedyn.
“Mae hyn i gyd dan fygythiad a rhaid i ni weithio gyda’n gilydd i sicrhau y gall ein ffermydd teuluol barhau i gynhyrchu bwyd cynaliadwy, maethlon i ni i gyd ei fwynhau.
“Trwy fwyta Cig Oen Cymru, rydych chi’n helpu i gynnal swyddi, cadw’r economi i fynd, diogelu ein treftadaeth, ein diwylliant a’n hiaith.”
Ychwanegodd y bydd Undeb Amaethwyr Cymru yn parhau i hyrwyddo ac amddiffyn ffermydd teuluol Cymru, yn genedlaethol ac yn unigol, i sicrhau bod ffermydd teuluol llewyrchus a chynaliadwy yng Nghymru.
