Diweddaraf – Golwg360

Ysgolion cynradd Môn am ddysgu o bell

Oherwydd staff a disgyblion yn profi’n bositif i’r Coronafeirws neu’n gorfod hunan-ynysu, bydd holl ysgolion cynradd Sir Fôn yn dysgu o bell o ddydd Mawrth (Rhagfyr 15) tan ddiwedd y tymor.

Fe fydd plant gweithwyr allweddol a phlant bregus yn cael gofal tan ddiwedd yr wythnos.

“Mae symud i ddysgu o bell ychydig ddyddiau yn fuan – gydag athrawon yn rhoi gwersi o bell – yn rhoi ychydig o le i bawb allu anadlu,” meddai’r Cynghorydd Llinos Medi, arweinydd Cyngor Sir Fôn.

Roedd Llywodraeth Cymru eisoes wedi cyhoeddi y bydd yr holl ysgolion uwchradd a cholegau yng Nghymru yn symud i ddysgu ar-lein o ddydd Llun.

Rhannu

14:19 ↑

Pryder am gynnydd achosion Covid-19 Ceredigion

Mae’r ffigurau diweddaraf yn dangos bod cyfradd achosion Covid-19 Ceredigion wedi codi i’w lefel uchaf erioed ers dechrau’r pandemig.

Cafodd 150 o achosion newydd eu cadarnhau dros y saith diwrnod diwethaf gan godi cyfradd y sir i 206.3 fesul 100,000 o’r boblogaeth.

Mae pryder penodol am raddau’r cynnydd yn ardal Aberaeron a Llanrhystud, sydd bellach wedi cyrraedd 507.3 fesul 100,000 o’r boblogaeth ac ardal Llanbedr Pont Steffan a Llanfihangel Ystrad sy’n parhau’n uchel ar 388.2 fesul 100,000 o’r boblogaeth (7 diwrnod rhwng 2 a 8 Rhagfyr).

Mae’r Cyngor Sir yn apelio ar drigolion i ddilyn y canllawiau i gadw eu teuluoedd yn ddiogel ac yn gofyn iddyn nhw gyfyngu eu cyswllt â phobl y tu allan i’w cartref.