Mae’r cerddor 43 oed newydd ryddhau ei sengl gyntaf, ‘Canghenion’, dan yr enw Pelydron.
Daw yn wreiddiol o bentref Llanfrothen yng Ngwynedd, ac mae yn gweithio mewn llyfrgell ym Mirmingham…
Pryd wnaethoch chi fynd ati i greu cerddoriaeth?
Wnes i gychwyn ar y bass yn tua 2002, pan oeddwn i yn fyfyriwr Celf yn Sheffield.
Wnes i ymuno efo band syrff o’r enw Texas Pete – cyn hynny roeddwn i yn ffan o’r band ac wedi bod i’w gweld nhw yn chwarae yn y tafarnau.
Ddes i’n ffrindiau gyda’r gitarydd, a phan wnaeth basydd gwreiddiol y band adael, ges i wahoddiad i ymuno.
Wnes i esbonio wrthyn nhw fy mod i erioed wedi chwarae dim byd yn fy mywyd, a wnaethon nhw jesd dweud: ‘Wnawn ni ddysgu bob dim i chdi’.
Pryd wnaethoch chi gychwyn creu caneuon?
Ar ôl i Texas Pete sblitio fyny, wnes i gychwyn cyfansoddi ar ben fy hun a thrio canu am y tro cyntaf, a’r band ddaeth allan o hynny oedd Navvy.
Ar y pryd roeddwn i wir yn hoffi bandiau fel The Fall a Talking Heads, ac yn fy meddwl dyna sut yr oedden ni yn swnio – ond dim really!
Roedd Navvy yn indi pop swnllyd iawn, caneuon byr, ac roedden ni yn chwarae full speed a sgrechian dros yr holl sŵn.
Pryd wnaethoch chi gychwyn y project Pelydron?
Cyn y cyfnod clo cyntaf roeddwn i yn gweithio yn y ganolfan gelf yma ym Mirmingham, ond unwaith wnaeth y Covid droi fyny wnaeth o gau lawr, a wnes i golli fy ngwaith.
A gan bo fi wedi cymryd voluntary redundancy, ges i bonus bach cash, ag efo’r arian bach yna wnes i brynu’r darnau bach o dechnoleg roeddwn i angen i greu’r miwsig, a gitâr fass melyn newydd.
Ond gan bo fi wedi bod mewn bandiau swnllyd o’r blaen, roeddwn i eisiau gwneud rhywbeth gwahanol – caneuon arafach, mwy melodig.
Sut gân yw ‘Canghenion?
Ym… dw i’n sort of dweud bod hi yn dream pop, ychydig bach yn space rocky ac arbrofol, efallai?
Ac mae’r bîts i gyd yn electronig.
Sut brofiad oedd symud o gefn gwlad i ddinas Sheffield i astudio Celf?
Wnes i setlo fewn yn eithaf cyflym, a sylweddoli fy mod yn berson eithaf urban!
Mae jesd dipyn bach mwy o gyfleon mewn dinas i ddod ar draws pobol sy’n debyg i fi ac yn licio’r un pethau.
Yr holl amser fues i’n byw yn Llanfrothen, dim ond fi oedd yn licio miwsig swnllyd a ffilms hir boring arti!
Beth ydych chi’n ei wneud ym Mirmingham?
Dw i’n gweithio mewn llyfrgell ac yn The Electric Cinema, sinema annibynnol, ac mae fy amser sbâr yn mynd i greu tiwns.
Ddes i yma i astudio Masters mewn Linguistics, sef astudio gwyddoniaeth iaith.
Beth yw’r nod hirdymor?
Dw i ddim eisiau bod yn ddarlithydd na dim byd fel yna, dw i eisiau cario ymlaen fel myfyriwr, a’r plan yw cychwyn PhD.
Dw i yn casáu byd gwaith a ddim yn licio gweithio nine to five, a jesd eisiau bod yn sdiwdant am gyn hired ag y medra i.
Ydach chi’n dod o deulu creadigol?
Na. Tydi gweddill y teulu ddim efo lot o ddiddordeb yn y Celfyddydau. Tydyn nhw ddim yn bobol sy’n eistedd lawr a darllen llyfr neu wylio ffilm.
Felly ia, fi ydy’r family weirdo sydd efo diddordeb yn y pethau yma!
Beth yw eich ofn mwya’?
Mae yn gas gen i bobol sy’n gwisgo fancy dress, yn enwedig os ydw i’n adnabod y person sydd yn y fancy dress…
Beth ydych chi’n ei wneud i gadw’n heini?
Dw i ar y beic bob diwrnod yn teithio drwy Birmingham, ac yn gwneud dipyn bach o redeg a dipyn bach o nofio.
Beth sy’n eich gwylltio?
Mae pawb yn dweud bo fi yn eithaf chilled, a does dim lot yn gwneud fi’n flin…
Pwy fyddech chi’n gwahodd i’ch pryd bwyd delfrydol… a beth fyddai’r wledd?
Oh… dw i’n licio bwyta bwyd ar ben fy hun.
Fi ydy’r person yn y tŷ sy’n cario tre o fwyd i’r llofft i fwyta te.
Ond tasa raid i chi gael cwpwl o arwyr o gwmpas y bwrdd…
Mark E Smith, canwr The Fall.
Ac mae yna linguist eithaf difyr, Daniel Everett, wnaeth symud o’r Unol Daleithiau i wledydd fel Brasil i drio cael y bobol leol i goelio yn Nuw.
Ond tra’r oedd o yna, wnaeth o golli ei ffydd a phenderfynu astudio ieithoedd y tribes.
Ac mae o wedi sgrifennu llyfrau grêt am language evolution.
Gan bwy gawsoch chi sws gorau eich bywyd?
Dw i yn dal i ddisgwyl!
Pa air neu ddywediad ydych chi’n gorddefnyddio?
Funky adventure…
Os oes yna lyfr yn dod nôl i’r llyfrgell ac mae o’n edrych fel ei fod o wedi cael ei gam-drin dipyn bach, wna i ddweud wrth y bos: ‘Wel mae’r llyfr yma wedi bod ar dipyn bach o funky adventure!’
Beth fu’r gigs wnaethoch chi fwynhau fwyaf?
Y gorau oedd pan oedd Navvy yn cefnogi band o’r enw The Long Blondes o Sheffield.
Gawson ni fynd efo nhw ar daith ac roedd yr holl beth yn grêt… gigio yn Llundain, Portsmouth, a fyny i Gaeredin a Glasgow.
Gwyliau gorau?
Dw i’n hoples am fynd ar wyliau. Dim ond unwaith rydw i wedi gadael y wlad. Es i i Baris tra’r oeddwn i ar y cwrs Celf, ond roeddwn i yn eithaf blin yr holl amser ac yn edrych ymlaen i ddod nôl i Sheffield.
Hoff ddiod feddwol?
Dw i ddim yn yfad alcohol dim mwy. Felly dim ond yn yfad Robinsons Peach Squash.
Beth yw’r llyfrau difyrraf i chi eu darllen?
Dw i ddim yn berson Gothi, ond dw i yn really licio Dracula gan Bram Stoker.
Mae The Secret History gan Donna Tart yn grêt hefyd.
A llyfrau Frans de Waal am animal intelligence.
Hoff air?
Dw i’n licio ‘sosij’. Dw i’n chwerthin bob tro dw i yn darllen ‘sosij’… ac mae ‘selsig’ yn eitha’ ffyni hefyd!
